Saǵyntaev koronavırýs týraly: Betperdege qosymsha tapsyrys berýge týra keldi
ALMATY. QazAqparat - Almaty ákimi Baqytjan Saǵyntaev halyqpen esepti kezdesýinde koronavırýspen kúres júrgizýde qandaı sharalar qolǵa alynyp jatqanyn aıtty, dep habarlaıdy QazAqparat tilshisi.
Ákimniń aıtýynsha, osy baǵytta shuǵyl túrde qala ákiminiń orynbasary Erjan Babaqumarovtyń basshylyǵymen arnaıy shtab qurylǵan.
«Barlyq qala qyzmetteri iske qosyldy. BAQ-tyń qatysýymen birneshe oqý-jattyǵý jumystaryn júrgizdik. Jolaýshylardy ushaqtan túsirip alyp, kútý zalyna deıin apardyq. Barlyq jerde dári dármek pen palatalar jabdyqtaldy. Basynda halyq arasynda hantalapaı bastaldy. Betperdelerdi túgel satyp alyp ketti. Qosymsha tapsyrys berýge týra keldi. Qazir qalada betperdeler jetkilikti. Barlyq Qytaıdan kelgen azamattardy aty-jónimen tekserdik. Baqytymyzǵa qaraı, koronavırýs eshqaısysynda joq», - dedi ákim.
Aıta keteıik, Almatyda Baqytjan Saǵyntaevtyń esepti kezdesýi ótip jatyr.
