Saǵyntaev koronavırýs tirkelgen jaǵdaıdaǵy qala tirshiligin qamtamasyz etý algorıtmin jasaýdy tapsyrdy
ALMATY. QazAqparat –Baqytjan Saǵyntaev koronavırýs ınfektsııasynyń taralýynyń aldyn alý jónindegi óńirlik shtabtyń otyrysyn ótkizdi, dep habarlaıdy QazAqparat tilshisi.
Jıyn barysynda ákim orynbasary - shtab basshysy Erjan Babaqumarov, qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova, Qoǵamdyq densaýlyq saqtaý basqarmasynyń basshysy Tileýhan Ábildaev, Kóliktegi taýarlar men qyzmetterdiń sapasyn jáne qaýipsizdigin baqylaý komıteti basqarmasynyń basshysy Nurlan Doǵalbaevtyń esebi tyńdaldy.
Ýákiletti organ ókilderiniń aıtýynsha, qazir qalada koronavırýs juqpasy joq.
Búginde qalada 490 adam karantınge alynǵan. Olardyń 407-si úılerinde oqshaýlansa, qalǵany túrli medıtsınalyq mekemelerinde statsıonarda jatyr.
Karantındegi tulǵalardyń eshqaısysynda kataraldy belgiler bilinbeıdi.
Osy juqpanyń aldyn alý maqsatynda indetke qarsy profılaktıkalyq sharalar kesheni qolǵa alyndy.
Qala ákimi azamattardy dıagnostıkalyq testileý ótkizý múmkindigin keńeıtý, úı karantıninde jatqan azamattardyń densaýlyǵyn baqylap otyrǵan mekeme qyzmetkerleriniń jumysyn jaqsartý kerektigin aıtty.
Sonymen qatar, bıliktiń epıdemııaǵa qarsy qolǵa alǵan sharalary jaıly aqparattyń ashyqtyǵyn qamtamasyz etýdi tapsyrdy.
Jıyndy qorytyndylaı kele Baqytjan Saǵyntaev koronavırýs tirkelgen jaǵdaıda qalanyń tirshiligin qamtamasyz etý algorıtmin jasaýdy buıyrdy.
