Saǵyntaev kelesi aptada úsh keńes ótkizedi
ASTANA. QazAqparat - Búgin Úkimettiń kezekten tys otyrysynda Baqytjan Saǵyntaev Premer-Mınıstr keńsesine mınıstrlerdiń, ákimdikterdiń tikeleı ózderiniń quziretine jatatyn máselelerge qatysty hattaryn qabyldamaýdy tapsyrdy, dep habarlaıdy QazAqparat.
«Apta ishinde men memlekettik satyp alý, jekeshelendirý jáne bıznesti tekserýge qatysty keńes ótkizemin. Mine, osy úsh keńesti jumaǵa deıin ózim ótkizemin», - dedi Saǵyntaev.
Sonymen qatar Premer-Mınıstr keshegi Úkimettiń keńeıtilgen májilisinde Elbasynyń árbir mınıstr ózine baǵynyshty organnyń damýyna tikeleı jaýapty ekendigin eskertkendigin eske saldy.
«Sondyqtan sizderdiń árqaısylaryńyzda týyndaǵan problemalyq máselelerdi derbes sheshýge jáne áriptes mınıstrlermen birlese tabysty jumys isteýge jetkilikti quziret bar. Osyǵan oraı Premer-Mınıstr keńsesine munan keıin mınıstrlerdiń, ákimdikterdiń tikeleı ózderiniń quziretine jatatyn máselelerge qatysty hattaryn qabyldamaýdy tapsyramyn. Sonymen qatar meniń jáne orynbasarlarym deńgeıinde ózderińizdiń quziretterińizge qatysty máseleler boıynsha keńes ótkizýge tyıym salamyn», - dedi Úkimet basshysy.
