Saǵyntaev «Qazaqstannyń sheteldik ınvestorlar keńesi» qaýymdastyǵynyń basqarma múshelerimen kezdesti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev «Qazaqstannyń sheteldik ınvestorlar keńesi» Qaýymdastyǵy (QShIKQ) basqarma múshelerimen kezdesý ótkizdi, dep habarlaıdy primeminister.kz.
Kezdesý barysynda elimizdiń ınvestıtsııalyq saıasatyn iske asyrý, ınvestıtsııalyq tartymdylyqty arttyrý jáne iskerlik ahýaldy jaqsartý máseleleri talqylandy. QShIKQ músheleri adam kapıtalyn, ınnovatsııalyq tehnologııalar men serpindi ındýstrııalardy damytý týraly pikirlerimen bólisti.
Anyqtama: «Qazaqstannyń sheteldik ınvestorlar keńesi» qaýymdastyǵy Qazaqstan Respýblıkasynyń Prezıdenti janyndaǵy Sheteldik ınvestorlar keńesiniń (ShIK) sheteldik músheleriniń bastamasy boıynsha resmı Hatshylyq jáne sheteldik taraptan Keńestiń qyzmetin úılestirýshi retinde qurylǵan.
Qaýymdastyq Keńestiń sheteldik múshelerine turaqty uıymdastyrýshylyq, úılestirý, aqparattyq jáne tehnıkalyq qoldaý kórsetedi. Qazaqstan tarapymen birlesip QR Prezıdentiniń tóraǵalyǵymen Keńestiń aralyq jáne plenarlyq otyrystaryn josparlaý jáne uıymdastyrý jumystarymen aınalysady. Sondaı-aq, QShIKQ óz músheleriniń atynan QR Úkimetiniń, memlekettik qurylymdardyń, sheteldik kompanııalardyń, dıplomatııalyq korpýstyń, bıznes-qaýymdastyqtardyń jáne t.b. ókilderimen áriptestik qarym-qatynas ornatý jumystaryn atqarady.
