Saǵyntaev Qazaqstan Respýblıkasynyń memlekettik marapattaryn tabystady

ASTANA. QazAqparat - Búgin Úkimet úıinde Premer-Mınıstr Baqytjan Saǵyntaev QR Prezıdentiniń Jarlyǵymen memlekettik jáne qoǵamdyq qyzmetterde sińirgen eńbekteri men elimizdiń áleýmettik-ekonomıkalyq jáne mádenı damýyna qosqan úlesteri, halyqtar arasyndaǵy dostyq pen yntymaqtastyqty nyǵaıtýǵa qosqan úlesteri úshin marapattalǵan memlekettik qyzmetkerler tobyna, shyǵarmashylyq zııalylar men bıznes qurylym ókilderine memlekettik marapattardy usyndy.

Úkimet saıtynyń habarlaýynsha, saltanatty shara barysynda Premer-Mınıstr kópshilikti alda kele jatqan Táýelsizdik kúnimen quttyqtap, atalǵan marapattaý rásiminiń mańyzdylyǵyn atap ótti. «Men úshin el Prezıdenti atynan memlekettik syılyqtardy tabystaý úlken mártebe. Tek qana memlekettik organ qyzmetkerlerine emes, sonymen qosa tanymal shyǵarmashylyq zııalylar men bıznes qurylym ókilderi de bar. Sizderdiń eńbekterińizsiz, barlyq qazaqstandyqtardyń kúsh salysýynsyz biz memleket damýynda osyndaı jetistikterge qol jetkizbes edik», - dedi Baqytjan Saǵyntaev.

«Qazaqstannyń jetistikterinde árbir azamattyń qosqan úlesi bar. Sol sebepti de Táýelsizdiktiń 25 jyldyǵy - bizdiń kópultty elimizdiń úlken ortaq merekesi. Bul beıbitshilik pen kelisim meıramy. Bul jetistikter men bizdiń Elbasymyzdyń jańa strategııalyq josparlarynyń merekesi. Osy mindetterdi biz birlesip, ortaq kúsh salysyp sheshýimiz kerek», - dedi Premer-Mınıstr.  

Baqytjan Saǵyntaev «Parasat» ordenderin QR ınvestıtsııalar jáne damý jónindegi birinshi vıtse-mınıstr Albert Raýǵa, QR Premer-Mınıstri Keńsesi basshysynyń orynbasary Álııa Qadyrbaevaǵa, QR Mádenıet jáne sport mınıstrliginiń jaýapty hatshysy Qýatjan Ýálıevke, «Kaspıı bank» AQ dırektorlar keńesiniń tóraǵasy Vıacheslav Kımge, QR Premer-Mınıstri Keńsesiniń qarjy-sharýashylyq bóliminiń meńgerýshisi Berdibek Meıirbekovke tabystady.

ІІ dárejeli «Dańq» ordenimen QR ishki ister vıtse-mınıstri Berik Bısenqulov marapattaldy.

«Qurmet» ordenimen QR syrtqy ister vıtse-mınıstri Roman Vasılenko, QR Premer-Mınıstri Keńsesi basshysynyń orynbasary Talǵat Sársenbaev, «Turǵynúıqurylysjınaqbanki» AQ basqarma tóraǵasy Aıbatyr Jumaǵulov jáne t.b. marapattaldy.

Ataqty qazaqstandyq aqyn-kompozıtor Asylbek Ábdirahman «Qazaqstannyń eńbek sińirgen qaıratkeri» qurmetti ataǵyna ıe boldy.

Birqatar Úkimet músheleri men Premer-Mınıstr Keńsesiniń qyzmetkerleri «Eren eńbegi úshin» medalimen, «Qazaqstan Respýblıkasy Táýelsizdiginiń 25 jyldyǵy» mereıtoılyq medaldarymen jáne QR Qurmet gramotasymen marapattaldy.