Saǵyntaev: Qazaqstan barsha álemnen talanttardy shaqyrady

ASTANA. QazAqparat - Qazaqstan barsha álemnen talantty adamdardy izdeýdi bastady. Bul týraly búgin Astana ekonomıkalyq forým aıasyndaǵy Innovatsııalyq sammıt barysynda QR Premer-Mınıstri Baqytjan Saǵyntaev málim etti, dep habarlaıdy QazAqparat.

Úkimet basshysynyń atap ótýinshe, bazalyq salalardyń básekege qabilettigin arttyra otyryp, onyń ishinde otyn-energetıkalyq keshendi eskere kele, Qazaqstanǵa ekonomıkalyq ósimniń jańa modelin damytý qajet. Bul turǵyda eń aldymen, ınnovatsııa men tehnologııaǵa mán beriledi.

«Bizdiń ekonomıkalyq ósim modelimiz bazalyq salalardyń tehnologııalyq qaıta jaraqtanýyna negizdeletin bolady dep aıtqan kezde barsha álemnen talantty jastardy birlesip izdeýdi meńzeımiz. Qazirgi kezde osy baǵytta kúres júrip jatyr. Jaqynda Ońtústik Koreıada forým jarııalanǵanyn, oǵan barsha elder shaqyrylatynyn, granttar bólinip, tıisti jaǵdaı jasalatynyn oqydym. Ózderińiz bilesizder, atalǵan el bizge qaraǵanda aıtarlyqtaı alysqa ketken. Osy baǵytta biz de búgin baǵdarlamalar ázirleýdemiz, sondaı-aq qajetti jaǵdaı jasalyp, granttardy bólemiz. Qazaqstanǵa barsha álemnen talanttardy shaqyratyn bolamyz»,-dedi Saǵyntaev.

Onyń paıymynsha, josparlanǵan sharalar iske asyrylǵan kezde elimizdegi talapty ári talantty jastar memleketti alǵa jeteleıtin bolady.

Aıta keteıik, búgin bastalǵan Astana ekonomıkalyq forýmyna 100 elden 4 myń delegat qatysýda. Olardyń arasynda saıasatkerler, ekonomıster, qarjylyq uıymdar men halyqaralyq uıymdardyń ókilderi bar.