Saǵyntaev kásipkerlermen qaladaǵy epıdemıologııalyq jaǵdaıdy talqylady

ALMATY. QazAqparat - Onlaın formatta ótken aımaqtyq úılestirý keńesiniń otyrysynda Almaty qalasynyń ákimi Baqytjan Saǵyntaev kásipkerlermen karantın talaptaryn saqtaý jáne shaǵyn jáne orta bıznesti qoldaý kórsetý máselelerin talqylady, dep habarlaıdy QazAqparat tilshisi.

Baqytjan Saǵyntaev mýtatsııaǵa ushyraǵan vırýs shtamynyń tarap, jaǵdaıdyń ýshyǵýyna baılanysty Almatydaǵy epıdemıologııalyq jaǵdaıdyń kúrdelengenin atap ótti.

Onyń aıtýynsha, taralý jyldamdyǵy boıynsha qazirgi jaǵdaı ótken jazǵa qaraǵanda áldeqaıda kúrdeli.

Epıdemııa bastalǵaly beri qaýipti vırýsty 32 597 adam juqtyrǵan (halyqtyń 100 myńyna shaqqandaǵy kórsetkish 1602,0 quraıdy). 1 qańtar men 27 naýryz aralyǵynda 14 856 adam.

2020 jyly KVI-di juqtyrǵan 18521 naýqas tirkelgen. 27 naýryzda bir kúnniń ishinde koronavırýs ınfektsııasyn juqtyrǵan 510 naýqas tirkeldi (jergilikti), sonyń ishinde 415 naýqasta sımptomdy bolsa, 95-i sımptomsyz.

Osy rette B. Saǵyntaev barsha turǵyndarǵa karantın talaptaryn qatań saqtaýǵa, betperde kıip, áleýmettik araqashyqtyqty saqtaýǵa jáne kópshilik sharalardy ótkizýden bas tartyp, adam kóp shoǵyrlanǵan jerge barmaýǵa shaqyrdy.

Kezdesýde kásipkerler salyqty, jaldaý aqysyn men basqa da mindetti tólemderdi keıinge qaldyrý, sondaı-aq qarjylyq qoldaý sııaqty sharalardy usyný týraly suraqtar qoıdy. Bul máseleni ákimdik úkimetpen birge talqylaıdy.

Qala ákiminiń tapsyrmasy boıynsha jazǵy alańdar men «Ashyq» jobasyna kiretin kompanııalardyń jumysyn qalpyna keltirý múmkindigi qarastyrylady.

Sonymen qatar, bıznes qaýymdastyq «Ashyq» jobasynyń fýnktsıonaldyǵyn keńeıtý jáne vaktsınalanǵan turǵyndarǵa densaýlyq pasportyn engizý týraly pikirler aıtty. Sondaı-aq, aımaqtyq úılestirý keńesiniń músheleri aldaǵy jappaı vaktsınatsııa naýqanyn qoldaýǵa daıyn ekendikterin bildirdi.