Saǵyntaev kásipkerlerdi memlekettik qoldaý quraldaryn belsendi paıdalanýǵa shaqyrdy
ASTANA. QazAqparat - Qyzylorda oblysynda QR Premer-Mınıstri Baqytjan Saǵyntaev «Atameken» Ulttyq kásipkerler palatasy óńirlik keńesiniń múshelerimen Memleket basshysynyń Joldaýyndaǵy jappaı kásipkerlikti damytý boıynsha alǵa qoıylǵan mindetterdi iske asyrý aıasynda shaǵyn jáne orta bızneske qoldaý kórsetý máselelerin talqylady, dep habarlaıdy primeminister.kz.
Kásipkerlikti damytý Úkimet qyzmetiniń qarjylaı jáne zańnamalyq qoldaý sharalarynan turatyn basym baǵyty bolyp tabylady. Ónimdi jumyspen qamtý men jappaı kásipkerlikti damytý baǵdarlamasy boıynsha shekti mólsherlemesiniń eń kóbi 6% bolatyn 17 mln teńgege deıin shaǵyn nesıeler berilýde.
Sonymen qatar, bıznes ortany qaıta retteý boıynsha keshendi jumystar júrgizilip jatyr, ruqsattar sany 3 esege qysqartyldy, memlekettik baqylaý jáne qadaǵalaý qyzmetterine tekseris júrgizildi, salyqtyq tekserister sany 40%-ǵa qysqartylatyn bolady.
Úkimet bıznestiń memlekettik-jekeshelik áriptestik tetikterin jetildirý men densaýlyq saqtaý jáne bilim berý nysandarynyń qurylysy salasynda zańnamalyq retteýdi jeńildetý boıynsha usynystaryn eskerdi. Sonymen qatar eskirgen normalar men erejeler kúshin joıady, ruqsat talaptarynyń sany qysqartylady.
Satyp alýlar salasyn jetildirip, bıznestiń kvazımemlekettik sektordy satyp alýǵa qoljetimdiligin jeńildetý úshin elektrondy alań, kategorııalyq júıe jáne biliktilik aldyndaǵy irikteý, ındýstrııalyq sertıfıkat jobasy iske asyrylady.
Aýyl sharýashylyǵynda kásipkerlikke qoldaý kórsetý maqsatymen AÓK damytý memlekettik baǵdarlamasy iske asyrylyp jatyr. Onyń aıasynda qarjy quraldary, jer resýrstaryn tıimdi paıdalanýǵa jaǵdaı jasaý, aýyl sharýashylyǵy tehnıkasymen qamtamasyz etýdi arttyrý, saýda-logıstıkalyq ınfraqurylymdy damytý men AÓK ǵylymı-tehnologııalyq qamtamasyz etý kózdelgen.
QR Premer-Mınıstri Baqytjan Saǵyntaev bıznes qatysýshylaryn, sonyń ishinde agrarlyq saladaǵy mamandardy usynylyp otyrǵan memlekettik qoldaý quraldaryn tıimdi paıdalanyp, ishki qajettilikti molyqtyryp, eksporttyq naryqqa shyǵarý úshin joǵary sapaly básekege qabiletti ónimderdi óndirýge shaqyrdy.
Baqytjan Saǵyntaev jergilikti qamtý úlesin arttyrý men jekeshelendirý rásimderin jeńildetý arqyly memlekettiń ekonomıkaǵa aralasýyn azaıtý máselelerine toqtalyp ótti. Jekeshelendirýge qatysý bızneske jańa jol ashýǵa múmkindik beredi.
Baqytjan Saǵyntaev óńirlik bıznestegi túıitkildi máselelerdi talqylaý úshin kásipkerlerdi dıalogqa jáne birlese jumys isteýge shaqyrdy. Shaǵyn jáne orta bıznesti damytý týraly «Atameken» UKP basqarma tóraǵasy A. Myrzahmetov aıtyp ótti. Oblystyń bıznes qaýymdastyǵynyń ókilderi, solardyń ishinde «Atameken» UKP óńirlik keńesiniń tóraǵasy A. Mahambetov, A. Ábdirazaqova, S. Imandosov, N. Ermanov kepildendirilgen shaǵyn nesıeler, «QazAgro» jelisi boıynsha nesıelendirý, «Bıznestiń jol kartasy - 2020» baǵdarlamasy boıynsha qyzmet kórsetý salasynda salyq tóleýden bosatý máselelerin qozǵady. Budan ózge, kásipkerler orta arnaıy oqý oryndaryn senimdi basqarýǵa ótkizý múmkindigine qyzyǵýshylyq tanytty.
Kóterilgen máselelerge Qyzylorda oblysynyń ákimi Q. Kósherbaev, QR qarjy mınıstri B. Sultanov, QR AShM birinshi vıtse-mınıstri Q. Aıtýǵanov, QR ulttyq ekonomıka vıtse-mınıstri S. Jumanǵarın túsinik berip ótti.
