Saǵyntaev kásipkerlerdi karantın sharalaryn saqtaýǵa shaqyrdy
ALMATY. QazAqparat – «Almaty» telearnasynyń Akimat Live tikeleı efır barysynda megapolıs ákimi Baqytjan Saǵyntaev kásipkerlerdi karantın shekteýlerin qatań saqtaýǵa shaqyrdy, dep habarlaıdy QazAqparat tilshisi.
Tikeleı efır barysynda Baqytjan Saǵyntaev qaladaǵy 32 monıtorıng toby belgilengen shekteýdiń saqtalýyn qadaǵalaıtynyn eske saldy. 8 qazan men 17 qarasha aralyǵynda 444 reıd júrgizilip, 3,6 myńǵa jýyq nysan tekserildi.
Tekserý barysynda 828 nysanda (22,5%) talapty saqtamaý anyqtaldy, 90 zańdy tulǵaǵa 28,7 mln teńge kóleminde 453 ákimshilik aıyppul salyndy. Maska rejımin buzǵan jeke tulǵalarǵa 15,5 mln teńgege aıyppul salynyp, 374 ákimshilik hattama toltyryldy.
«Alda kúrdeli kezeń tur, aýrý órshı túsetin bolady. Vaktsına paıda bolǵansha biz sanıtarlyq-epıdemıologııalyq qaýipsizdik sharalaryn qatań saqtaýǵa tıispiz», — dep atap ótti Baqytjan Saǵyntaev.
Megapolıs ákimi oıyn saýyq jáne qoǵamdyq tamaqtandyrý salasynda jumys isteıtin shaǵyn jáne orta bıznes ókilderin osynaý kúrdeli kezeńde yntymaqtastyq tanytýǵa bir qadam jasaýǵa shaqyrdy.
«Eger biz bir-birimizge kómektespesek, kemshilik jalǵasady, ıaǵnı koronavırýs ınfektsııasyn juqtyrǵandar sany artady. Sondyqtan kásipkerler karantınge qatysty belgilengen jumys kestesin saqtaý qajet», — dep atap ótti B. Saǵyntaev.
