Saǵyntaev Qaraǵandy oblysynyń Kásipkerlerge qyzmet kórsetý ortalyǵynyń jumysymen tanysty

ASTANA. QazAqparat - QR Premer-Mınıstri Baqytjan Saǵyntaev bıznesmenderge servıstik jáne konsýltatsııalyq qyzmetter kórsetiletin Qaraǵandy oblysynyń Kásipkerler palatasy janyndaǵy Kásipkerlerge qyzmet kórsetý ortalyǵyn aralady. Bul týraly primeminister.kz habarlady.

KQKO-nyń operatsııalyq zalynda kásipkerlerge damý ınstıtýttary, atap aıtqanda, «Damý» qory, HQKO, ekinshi deńgeıdegi bank jáne ınvestorlarǵa qyzmet kórsetý ortalyǵynyń ókilderi keńes beredi. Arnaıy «Oqý synybynda» Ónimdi jumyspen qamtý jáne jappaı kásipkerlikti damytý baǵdarlamasy aıasynda nesıeleý sharttary men qoldaý sharalaryn túsindirý boıynsha semınarlar ótkiziledi.

QR Prezıdenti N. Nazarbaevtyń Joldaýyna sáıkes kásipkerlikti damytý elimizde ekonomıkalyq ósimniń jańa modelin qalyptastyrý kezinde basty baǵyttardyń biri bolyp tabylady. Osyǵan baılanysty QR Úkimeti «Atameken» UKP-men birge otandyq bıznesti qoldaý sharalaryn keńeıtý boıynsha, onyń ishinde Ónimdi jumyspen qamtý jáne jappaı kásipkerlikti damytý baǵdarlamasyn iske asyrý arqyly keshendi jumys júrgizýde.

Aıta keterligi, 2016 jyly qaraǵandylyq Kásipkerlerge qyzmet kórsetý ortalyǵy kásipkerlik qyzmettiń 3 433 sýbektisine 4 668 servıstik qyzmet kórsetti. Budan ózge, 2016 jyly «Jumyspen qamtýdyń jol kartasy 2020» baǵdarlamasy aıasynda munda 299 jumyssyz kásipkerlik negizderin oqydy, 138 adam jalpy 395 mln teńge somaǵa qarjylandyrý aldy.