Saǵyntaev qar kóshkininen qaza tapqan áskerılerdiń otbasylaryna kóńil aıtty
ASTANA. QazAqparat - Búgin QR Úkimeti otyrysynda elimizdiń Premer-Mınıstri Baqytjan Saǵyntaev Mınıstrler kabıneti músheleriniń atynan Jambyl oblysynda qar kóshkininen qaza tapqan áskerı qyzmetshilerdiń otbasylaryna kóńil aıtty, dep habarlaıdy QazAqparat.
«17 aqpan kúni Jambyl oblysynda qaıǵyly oqıǵadan 7 áskerı qyzmetshi qaza taýyp, 8 adam jaraqat aldy. Úkimet atynan qaza tapqandardyń otbasylary men týystaryna kóńil aıtamyn. Oqıǵa ornyna Elbasynyń tapsyrmasy boıynsha Qorǵanys mınıstrliginiń arnaıy komıssııasy baryp qaıtty», - dedi Úkimet otyrysyn ashqan Baqytjan Saǵyntaev.
Eske sala keteıik, aqpannyń 17-si kúni Jambyl oblysy Jýaly aýdanyndaǵy Kóksaı shatqalynda bolǵan qar kóshkini kezinde áskerı daıydyqtaryn júrgizgen áskerıler qaza tapty. 16 adam qutqarylsa, 7 sarbaz qaıtys boldy.
Resmı málimetke sáıkes, qaıtys bolǵan sarbazdardyń otbasylaryna 5 jyldyq aılyq eseptik kórsetkish mólsherinde materıaldyq kómek kórsetiledi.
