Saǵyntaev qalanyń abattandyrý jumysyn tekserdi
ALMATY. QazAqparat Almaty qalasynyń ákimi Baqytjan Saǵyntaev Medeý aýdanynda ornalasqan saıabaq, alań, aýlalardy abattandyrý jumysyn tekserdi, dep habarlaıdy QazAqparat tilshisi.
Baqytjan Saǵyntaev Instagram -daǵy paraqshasynda Kishi Almaty ózeniniń jaǵalaýyndaǵy abattandyrý jumystary jaıynda jazdy. h
«Uzyndyǵy 8,9 shaqyrym bolatyn Terrenkýr sý qoımasynyń ekojúıesi saqtala otyryp, bul jer abattandyrylyp, retke keltiriledi. Uzyndyǵy 4,2 shaqyrym Esentaı ózeniniń sý qorǵaý beldeýi men arnasynda qaıta jańǵyrtý jumystary bastaldy. Ózen arnalary tazartylyp, jaǵalaýy nyǵaıtylýda. Osylaısha qala aýmaǵynda biregeı tabıǵı park qurylady»,– dep jazdy qala basshysy.
Kopernık pen Dobrolıýbov kósheleriniń qıylysynda balalar jáne sport alańy bar, jaıaý júrginshilerge arnalǵan yńǵaıly aımaq pen Kishi Almaty ózeniniń jaǵalaýynda abattandyrylǵan qoǵamdyq keńistik salynýda. Buryn bul jer qaraýsyz jatqan ýchaske edi. Sondaı-aq aýdanda Bógenbaı batyr kóshesi boıyndaǵy jaıaý júrginshiler aımaǵy, Dostyq saıabaǵy men aýla aýmaqtary jóndelip, qaıta qurylýda.
«Bastysy qurylys materıaldarynyń sapasyna mán berip, jaıaý júrginshiler aımaǵy men demalys oryndaryn salý kezinde azamattardyń pikirine qulaq asýdy tapsyrdym. Dál osylaı 28 gvardııashy-panfılovshylar saıabaǵy men qaraýsyz jatqan Shýhov skveri jóndeldi. Sondaı-aq saıabaq pen jaıaý júrginshiler aımaǵy, aýlalar jańartylady.
Jalpy bıyl qalada 20 gúlzar men 2 saıabaq jóndelip, 16 jasyl aımaq pen 7 jaıaý júrginshiler kóshesi, 5 ózen jaǵalaýy abattandyrylmaq. Barlyq abattandyrylatyn aımaqtardyń jalpy aýdany – 284 ga», – dep atap ótti Almaty Baqytjan Saǵyntaev.
