Saǵyntaev qalanyń abattandyrý jumystarymen tanysty
ALMATY. QazAqparat – Almaty qalasynyń ákimi Baqytjan Saǵyntaev Túrksib aýdanynyń qoǵamdyq keńistiginiń abattandyrý jumystarymen tanysty, dep habarlaıdy QazAqparat tilshisi.
«Túrksib aýdanynyń qoǵamdyq keńistiginiń abattandyrý jumystarymen tanystym. Esep berý kezdesýleri kezinde turǵyndardyń ózderi usynǵan ýchaskelerge erekshe kóńil bólindi. Mysaly «Jas Kanat» yqshamaýdanyndaǵy qaraýsyz qalǵan jerdiń ornyna saıabaq, al Sobolev kóshesinde sport alańy paıda boldy. Jańartylǵan «Býdenyı» alańymen birge bul jerler eresekter men balalardyń súıikti mekenine aınaldy. Munda ýaqytty tıimdi ótkizýge barlyq jaǵdaı jasalǵan»,– dep jazdy Baqytjan Saǵyntaev Instagram-daǵy paraqshasynda.
Sonymen qatar, ol aýlalardyń retke keltirilip jatqanyn atap ótti.
« Ahmetov kóshesindegi úı turǵyndarynyń aıtýynsha, olar úı mańyndaǵy aýmaqtyń jóndelýin 30 jyl kútken. Zamanaýı oıyn, vorkaýt jáne demalys aımaqtary turǵyndar úshin taptyrmas oryn boldy. Olar birlese aýmaqty kógaldandyrdy. Endi menshik ıeleri birlestikterin qurý máselesin qolǵa alyp, óz aýlalarynda tártip ornatpaqshy. Bul — quptarlyq áreket. Turǵyndar turǵyn úı sharýashylyǵyn ustaý máselelerin óz betinshe sheshýge quqyly jáne sheshe de alady»,– dep jazdy ákim.
