Saǵyntaev qalany aralap, mobıldi beketterden ýchaskelik polıtseılerdi tappady
ALMATY. QazAqparat – Almaty ákimi Baqytjan Saǵyntaev polıtsııanyń mobıldi pýnktterin aldyn ala eskertpesten aralap shyqty, dep habarlaıdy QazAqparat tilshisi.
Shahar basshysy turǵyndardyń aryz-shaǵymyna kóz jetkizbekshi bolǵanyn jetkizdi.
«Keshe keshke eskertýsiz «Atakent», «Mereı» saýda úıi, Kók bazar, Arbat, Meńdiqulov – Bekturov kósheleriniń qıylysyndaǵy, Gandı saıabaǵyndaǵy mobıldi polıtsııa beketterin aralap shyqtym. Sol pýnktterdiń bireýinde ǵana ýchaskelik polıtseı boldy. Basqalarynda jaryq janyp turǵanymen, kezekshi bolǵan joq. Polıtsııa qyzmetkerleriniń ornyna saýda nysandarynyń kúzetshileri júrdi», - dedi ákim áleýmettik jelidegi paraqshasynda.
Onyń aıtýynsha, qala turǵyndary mobıldi polıtsııa pýnktterinde tártip saqshylaryn tabý qıyn ekendigine jıi shaǵymdanady.
«Qoǵamdyq qaýipsizdikti qamtamasyz etýge bulaısha nemquraıdy qaraýǵa bolmaıdy! Sondyqtan búgin apparattyq jıynda qaladyq Polıtsııa departamentiniń basshysy Serik Kúdebaevqa eskertý jasadym. Medeý, Almaly, Bostandyq, Jetisý aýdandarynyń polıtsııa basshylaryna sógis jarııalaýdy tapsyrdym. Aýdan ákimderine de baqylaýdyń joqtyǵy úshin eskertý aıtyldy», - dedi ákim.
Qala basshysy almatylyqtardyń qaýipsizdigi — ákimdik jumysynyń basty baǵyttarynyń biri ekendigin atap ótti.
