Saǵyntaev Іshki ister mınıstrligine Ýnıversıada kezinde qoǵamdyq tártipti qamtamasyz etýdi tapsyrdy
ASTANA. QazAqparat - Búgin QR Úkimetiniń selektorlyq rejimdegi otyrysynda Premer-Mınıstr Baqytjan Saǵyntaev Almatyda ótetin 28-shi Búkilálemdik qysqy Ýnıversıadaǵa baılanysty birqatar memlekettik organǵa naqty tapsyrmalar júktedi, dep habarlaıdy QazAqparat.
«Búgingi baıandamalardan bilgenimiz, Almaty qalasy Búkilálemdik qysqy Ýnıversıada oıyndaryn ótkizýge negizinen daıyn. Ýnıversıada iri sporttyq saıys qana emes, sonymen birge elimizdiń abyroı-bedeline qatysy bar mańyzdy shara. Sol sebepten de Almaty qalasy ákimdigi qabyldap jatqan keıbir máselelerge almatylyqtar túsinistikpen qaraıdy dep oılaımyn. Ol endi ýaqytsha ǵana kemshilikter bolýy múmkin», - degen Úkimet basshysy bul baıraqty básekeniń joǵary deńgeıde ótýine bárimiz atsalysýymyz qajettigin atap ótti.
Sonymen qatar Premer-Mınıstr birqatar naqty tapsyrmalar berdi.
«Almaty qalasynyń ákimdigi Investıtsııalar jáne damý mınıstrligimen jáne ózge de múddeli memlekettik organdarmen birge kóliktik-logıstıka máselelerin, Ýnıversıadanyń jańa nysandarynyń qaýipsizdik talaptary men standarttaryna saı jumys isteýin taǵy bir tyńǵylyqty pysyqtaýy tıis. Іshki ister mınıstrligi adamdar jappaı jınalatyn nysandardaǵy, qonaq úıler men qoǵamdyq oryndardaǵy, qoǵamdyq kólikterdegi órt qaýipsizdigi jaı-kúıine baqylaýdy kúsheıtýi qajet. Jalpy, ІІM-ge qoǵamdyq tártipti qamtamasyz etýdi tapsyramyn», - dedi Saǵyntaev.
Úkimet basshysy Aqparat jáne kommýnıkatsııalar mınıstrligine aqparattyq-ımıdjdik jumystarǵa basa nazar aýdarýdy júktedi. Al Densaýlyq saqtaý jáne áleýmettik damý mınıstrligine Ýnıversıada kezinde medıtsınalyq qyzmet kórsetýge aıryqsha mán berý tapsyryldy.
