Saǵyntaev iri halyqaralyq ınvestorlarmen kezdesti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev erteń Astanada ótetin Kazakhstan Global Investment Roundtable (KGIR-2018) ınvestıtsııalyq forýmynyń qatysýshylarymen birqatar kezdesýler ótkizdi, dep habarlaıdy QazAqparat primeminister.kz silteme jasap.
Kezdesý barysynda ınvestıtsııalar jáne saýda salasynda yntymaqtastyqty odan ári damytý máseleleri talqylandy. Sheteldik ınvestorlar Qazaqstanda iske asyrylyp jatqan asa tartymdy jobalar týraly áńgimelep, bolashaq josparlarymen bólisti, sondaı-aq Qazaqstan ekonomıkasynyń ınvestıtsııalar salý úshin asa perspektıvaly salalaryn basa aıtty.
«ROTEK» AQ Dırektorlar keńesiniń tóraǵasy Mıhaıl Lıfshıtspen kezdesýde Qazaqstannyń munaıgaz jabdyǵy óndirisi, boljamdyq júıesin damytý, óndirýshi qýattylyqtaryn jańǵyrtýda ozyq tehnologııalardy qoldaný salasyndaǵy máseleler talqylandy.
Aıta keterligi, «ROTEK» AQ týrbınalyq óndiriske servıstik qyzmet kórsetý úshin mashına jasaý jáne óndiristik qýattylyqtar salasynda eń úzdik mamandarǵa ıe. Zamanaýı tehnologııalar men joǵary bilikti kadrlar kompanııany turaqty tabysty kásiporyn jáne senimdi seriktes retinde kórsetedi.
«Sun Group» basqarmasynyń vıtse-tóraǵasy Shıv Hemkamen kezdesý aıasynda jańa tehnologııalar, tabıǵı resýrstar, aqyldy qalalar men aqyldy egin sharýashylyǵy tárizdi ınvestıtsııa salý salalary qarastyryldy.
Óz kezeginde B. Saǵyntaev QR Úkimeti óńdeý ónerkásibi jobalaryn iske asyrýda qordyń qatysýyn tolyq qoldaıtynyn málim etti.
«SUN Group» kompanııasy Reseı, Úndistan jáne basqa da damýshy elderdiń naryqtaryndaǵy jetekshi ınvestıtsııalyq kompanııalardyń biri. Kompanııalar toby aeroǵaryshtyq jáne munaıgaz ónerkásibi, metallýrgııa, jyljymaıtyn múlik, ınfraqurylym, azyq-túlik ónimderi óndirisi, sonymen qatar jańartylatyn energııa kózder tárizdi salalarda jumys isteıdi.
«Milken Institute» basqarýshy dırektory Djeıms Morganmen kezdesý barysynda ınfraqurylym, densaýlyq saqtaý jáne adam kapıtalyn damytý salalaryndaǵy jobalar týraly sóz boldy. Atap aıtqanda, M. Djeıms Mılken ınstıtýtynyń músheleri bolyp tabylatyn ınstıtýtsıonaldyq ınvestorlar jelisi týraly aıtty.
Al, Milken Institute AQSh-ta Kalıfornııadaǵy táýelsiz ekonomıkalyq saraptama ortalyǵy. Instıtýt AQSh pen álemdegi áleýmettik saýalnamalar boıynsha naryq qaǵıdattary men qarjylyq ınnovatsııalar paıdalanylatyn zertteýlerdi jarııalaıdy jáne konferentsııalar ótkizedi.
RF men EAEO elderindegi «Servier» kompanııasynyń basqarýshy dırektory Jerom Gavemen kezdesý barysynda Qazaqstannyń ınnovatsııalyq dári-dármekteri óndirisine ınvestıtsııalar salý jáne zamanaýı tehnologııalar transferti máseleleri qaraldy.
«Servier» kompanııasynyń Qazaqstandaǵy ókildigi 1996 jyly kompanııa shyǵaratyn dári-dármekterdi óndirý, sondaı-aq qazaqstandyq dıstrıbıýterlerge kompanııa óndiretin medıtsınalyq preparattardy jetkizýde qoldaý kórsetý maqsatynda qurylǵan.
Ortalyq Azııa aımaǵy boıynsha «ENI» vıtse-prezıdenti Lýka Vınıatımen ekijaqty kezdesý barysynda áleýmettik jobalardy barlaý jáne ken alý salasynda, sondaı-aq jańartylatyn energııa kózderi salasynda iske asyrýda yntymaqtastyq ornatý máseleleri qarastyryldy.
«ENI» - halyqaralyq munaıgaz kompanııasy, álemniń 73 elinde jemisti jumys istep turǵan, moıyndalǵan alyptardyń biri. 2017 jylǵy 30 maýsymdaǵy derek boıynsha, kompanııanyń jıyntyq naryqtyq quny $55 mlrd qurady. Kompanııa Qazaqstanda 1992 jyldan munaıgaz shıkizatyn barlaý jáne alý salasynda jumys istep keledi.
Eske salaıyq, erteń, 2018 j. 3 shildesinde Astana QR Premer-Mınıstri Baqytjan Saǵyntaevtyń tóraǵalyǵymen ekinshi Kazakhstan Global Investment Roundtable (KGIR-2018) ótedi. Sharanyń negizgi maqsaty - Qazaqstannyń ınvestıtsııalyq múmkindikterin tanystyrý, QR ınvestıtsııalar, ekonomıkalyq damý jáne básekege qabilettilikti arttyrý salasyndaǵy saıasatyn talqylaý.
