Saǵyntaev HVQ basqarýshy dırektorynyń orynbasarymen kezdesti
Kezdesý barysynda HVQ-men turaqty ekonomıkalyq ósimge járdemdesý boıynsha yntymaqtastyqty keńeıtý jáne odan ári damytý máseleleri talqylandy.
Qordyń aqsha-nesıe jáne bıýdjettik saıasatty jetildirý, qolaıly bıznes ortany qamtamasyz etý jáne kásipkerlerdiń kúshti orta tobyn qurý, ınvestıtsııalyq saıasat, ınnovatsııalarǵa baǵdarlanǵan «tsıfrlyq dáýir» ónerkásibin qurýǵa baǵyttalǵan ındýstrııalandyrý, tehnologııalar transferti jáne óńdeý ónerkásibin tsıfrlandyrýǵa kómektesý sekildi máseleler boıynsha járdemdesýiniń jáne qoldaý kórsetýiniń perspektıvalyq baǵyttary qaraldy.
Qarjy habyna jáne ınvestıtsııalyq belsendilik ortalyǵyna aınalatyn «Astana» halyqaralyq qarjy ortalyǵynyń qyzmetine qatysty máseleler qozǵaldy.
Anyqtama: Qazaqstan HVQ-ǵa 1992 jylǵy 15 shildede múshe boldy. 2010 jyldyń kúzinen bastap Qazaqstan HVQ-nyń Shveıtsarııa, Polsha, Serbııa, Ázerbaıjan, Qyrǵyzstan, Túrkimenstan jáne Tájikstan elderi kiretin Shveıtsarııalyq kishi tobyna qosyldy (buǵan deıin Qazaqstan Belgııa kishi tobynyń quramynda boldy).
Halyqaralyq valıýta qorynyń (HVQ) basqarýshy dırektory Krıstın Lagard hanym Chjan myrzany HVQ basqarýshy dırektorynyń orynbasary laýazymyna taǵaıyndaý kezinde T. Chjannyń halyqaralyq ekonomıka salasynda tájirıbesi bar ekenin, ol memlekettik sektordaǵy ekonomıkalyq saıasatty ázirleý jáne júrgizý daǵdylarymen jáne dıplomatııalyq daǵdylarmen sátti úılesetinin aıtqan edi.
«Sondaı-aq, onyń halyqaralyq qarjy uıymdarynda úlken tájirıbesi bar, ol jaqsy qarym-qatynas ornatý men kelissózder júrgizý daǵdylaryna ıe, sonymen qatar HVQ-nyń saıasaty men rásimderin jaqsy meńgergen», - degen edi Krıstın Lagard.
Óziniń mansabynda Chjan myrza Qytaı ulttyq bankinde ártúrli laýazymdarda eńbek etken, onyń ishinde Qarjylyq tekserý jáne statıstıka departamentiniń bas dırektory laýazymyn, keıinirek Halyqaralyq departamenttiń bas dırektory qyzmetin atqarǵan.
Budan ózge, Chjan myrza Dúnıejúzilik bankte (1995-1997 jyldary) jáne Azııa damý bankinde (1997-2004 jyldary) jumys istegen. Kalıfornııa ýnıversıtetinen (Santa-Krýz) halyqaralyq ekonomıka magıstri jáne doktory dárejelerin alǵan, sondaı-aq Beıjińde Tsınhýa ýnıversıtetinen elektr tehnıkasy salasynyń bakalavry jáne qarjy magıstri dárejelerin alǵan.
