Saǵyntaev halyqqa memlekettik qyzmet kórsetý úderisterin jetildirý jóninde keńes ótkizdi
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev halyqqa memlekettik qyzmet kórsetý úderisterin jetildirý jóninde keńes ótkizdi, dep habarlaıdy QR Úkimetiniń baspasóz qyzmeti.
Keńes barysynda «Azamattarǵa arnalǵan úkimet» Memlekettik korporatsııasynyń memlekettik qyzmet kórsetý úderisterin avtomattandyrý jáne oǵan jańa tásilderdi engizý máseleleri talqylandy.
«Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýyndaǵy Memleket basshysynyń tapsyrmalaryn iske asyrý maqsatynda «Azamattarǵa arnalǵan úkimet» Memlekettik korporatsııasy júgingen azamattyń mindetti jeke qatysýynsyz proaktıvti qyzmet kórsetýge kóshý tetigin engizýdi josparlaýda. Budan ózge, halyqaralyq tájirıbeni eskere otyryp, Biryńǵaı qyzmet kórsetý ortalyǵyn qurý tujyrymdamasy ázirlendi.
Aıta keteıik, proaktıvti qyzmet kórsetýdi júzege asyrýdy 2018-2020 jyldary «Tsıfrlyq Qazaqstan» Memlekettik baǵdarlamasy aıasynda «Proaktıvti memleket» baǵyty boıynsha júzege asyrý josparlanǵan.
Eske salsaq, «Azamattarǵa arnalǵan úkimet» Memlekettik korporatsııasy QR Úkimetiniń 2016 jylǵy 29 qańtardaǵy Qaýlysymen qurylǵan jáne memlekettik qyzmet kórsetýdiń biryńǵaı provaıderi bolyp tabylady. Qazirgi tańda Qyzmet kórsetý tiziliminde 723 memlekettik qyzmet kórsetý bar, olardyń 548-i Memlekettik korporatsııa arqyly qoljetimdi.
