Saǵyntaev Halyqaralyq valıýta qorynyń Qazaqstandaǵy mıssııasy basshysymen kezdesti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Halyqaralyq valıýta qorynyń Qazaqstandaǵy mıssııasynyń basshysy Mark Hortonmen kezdesti. Bul týraly primeminister.kz saıtynda habarlandy.
Kezdesý barysynda HVQ-men makroekonomıkalyq jáne salyq-bıýdjet saıasatyn, qarjy sektorynyń qyzmetin damytý, sonymen qatar «Nurly jer» jáne «100 naqty qadam» Ult jospary aýqymdy baǵdarlamalaryn, jekeshelendirý, jer reformasy baǵdarlamalary men «Astana» halyqaralyq qarjy ortalyǵyn iske asyrý boıynsha odan arǵy ózara is-qımyl máseleleri talqylandy.
Halyqaralyq valıýta qorynyń Qazaqstandaǵy mıssııasynyń basshysy Mark Horton Qazaqstandaǵy oń ózgeristerdi atap óti. Ortasha merzimdi kezeńde álemdik ekonomıkada, qarjy jáne taýarlyq naryqtarda turaqty jaǵdaıdy saqtaý kózdelip otyr.
«Qazaqstan «jańa qalypty jaǵdaıǵa» sátti beıimdeldi jáne ıkemdi ekonomıka modelin ustanýyn jalǵastyryp keledi. Makroekonomıkalyq turaqtylyq platsdarmy - memleket júrgizip otyrǵan monetarlyq jáne qazynalyq saıasat, turaqty qarjy sektory men qor naryǵy», - dedi M. Horton.
M. Horton atap ótkendeı, iske asyrylyp jatqan baǵdarlamalyq qujattarmen qatar, ekonomıkalyq ósimniń qozǵaýshy kúshi Tórtinshi ónerkásiptik revolıýtsııa jáne jappaı tsıfrlandyrý elementterin engizýdi eskerýmen ekonomıka salalaryn tehnologııalyq jańǵyrtý bolyp tabylady. Jańashyldyqtardyń negizgi ıelenýshileri óńdeý sektory, aýyl sharýashylyǵy, kólik jáne logıstıka, sonymen qatar qurylys bolady.
«Indýstrııalyq-ınnovatsııalyq damý, turǵyn úı qurylysyn ınfraqurylymdyq damytý, ekonomıkany tsıfrlandyrý jáne basqa da baǵdarlamalardy iske asyrýdyń arqasynda ekonomıkanyń barlyq salalaryn alǵa jeteleıtin damytý qamtamasyz etilgen. Biz sizderge barlyq memlekettik baǵdarlamalardy ilgeriletý men sátti iske asyrýda qoldaý bildiremiz», - dedi HVQ mıssııasynyń basshysy.
QR Premer-Mınıstri Baqytjan Saǵyntaev Qazaqstan Úkimeti HVQ ózara is-qımyl tájirıbesimen almasýǵa jáne úzdik praktıkalaryn taratýǵa yqpalyn tıgizýge ázir ekenin atap aıtty.
Qazaqstan 1992 jyly 15 shildede HVQ múshesi boldy. 2010 jyldyń kúzinen bastap QR HVQ shveıtsarııalyq tobyna endi (buryn Qazaqstan HVQ belgııalyq tobyna engen edi), oǵan Shveıtsarııa, Polsha, Serbııa, Ázerbaıjan, Qyrǵyzstan, Túrikmenstan, Tájikstan elderi de kiredi.
