Saǵyntaev halyqaralyq ál-aýqat qorlary forýmyna qatysty
ASTANA. QazAqparat - Astanada Halyqaralyq táýelsiz ál-aýqat qorlarynyń forýmy (IFSWF) óz jumysyn bastady. IFSWF jyl saıynǵy IX otyrysynyń ashylý saltanatyna QR Premer-Mınıstri Baqytjan Saǵyntaev qatysty, dep jazady primeminister.kz.
Shara qatysýshylaryna sálemin joldaǵan Baqytjan Saǵyntaev ortalyq azııalyq aımaqta alǵash ret ótip otyrǵan IFSWF forýmynyń mańyzdylyǵyn atap ótti.
«Bul biz úshin úlken abyroı ári úlken jaýapkershilik. Qazaqstan Úkimeti bizdiń bul otyrysymyz táýelsiz qorlar úshin eń ózekti kún tártibin muqııat qarastyryp, jańa syn-tegeýrinder men mindetterge saı keletin is-áreketter josparyn ázirleıdi degen senimde», - dedi QR Premer-Mınıstri.
Baqytjan Saǵyntaevtyń aıtýynsha, sońǵy birneshe jylda qarjy naryqtarynda irgeli ózgerister oryn aldy.
«Biz tsıfrlyq ınnovatsııalardyń jan-jaqty engizilip jatqanyn kórip otyrmyz. Tehnologııalyq progress ınvestıtsııalaý úshin jańa múmkindikter ashady. Sonymen qosa, jańa álemdik ekonomıkalyq shynaıylyq bizdiń aldymyzǵa jańa qaterler tóndirip otyr. Álemdik ósimniń baıaýlaýy men qor naryqtarynyń qubylmalylyǵy bizdi ınvestıtsııalyq tabystylyqty qamtamasyz etýdiń jańa sheshimderin izdeýge, bizdiń menedjment strategııalarymyzdy qaıta qaraýǵa, tıimdiliktiń jańa tetikteri men krıterıılerin engizýimizge májbúrleıdi»,- dep atap ótti Premer-Mınıstr.
Baqytjan Saǵyntaev úılesimdi is-qımyldar jasaý úshin kúsh-jigerdi biriktirýge shaqyrdy.
«Bizdiń jańa ekonomıkalyq shynaıylyqqa tek osylaı ǵana saıma-saı jaýap qata alatynymyzǵa senimdimin», - dedi Premer-Mınıstr.
Sonymen qatar ol Qazaqstannyń óz tájirıbesimen bólisýge ázir ekenin aıtty.
«Qazaqstan táýelsizdik jyldary aýqymdy ilgerileýge bet aldy. Bul bizdiń shynaıylyqtardy eskere otyryp, eń úzdik álemdik tájirıbeni ıkemdi ári júıeli engizýdiń nátıjesinde múmkin boldy», - dedi Baqytjan Saǵyntaev.
Qazaqstannyń óz ınvestorlaryna usynatyn tartymdy ınvestıtsııalyq stımýldary týraly aıta kelip, Baqytjan Saǵyntaev ınvestıtsııalaý úshin basymdyqty sektorlardy atap ótti. Bular - mashına jasaý, AÓK, kólik jáne logıstıka, munaı hımııasy, ilgerilemeli tehnologııalar salasy, týrızm jáne basqa da salalar.
Sonymen qatar QR Premer-Mınıstri Qazaqstan Úkimetiniń halyqaralyq ınvestıtsııalyq qaýymdastyqpen ashyq dıalog ornatýǵa árdaıym daıyn ekenin atap aıtty.
«Bizdiń mundaı saıasatymyzdy halyqaralyq qaýymdastyq joǵary baǵalady. Máselen, Dúnıejúzilik banktiń bıznes júrgizý úshin qolaıly jaǵdaılar reıtınginde Qazaqstan aımaqta birinshi oryn, al álemde 35-shi oryndy aldy. Biz ınvestorlar men strategııalyq seriktesterimizge qosh keldińder deımiz, olardy odan ári tájirıbe almasýǵa jáne ózara tıimdi yntymaqtastyqqa shaqyramyz. Bizdiń bárimizdiń jańa naryqtar men baǵyttardy aıqyndaý jolyndaǵy eńbegimiz jemisti bolady dep úmittenemin», - dedi Baqytjan Saǵyntaev.
IFSWF 9-shy jyl saıynǵy otyrysynyń ashylý saltanatyna «Samuryq Qazyna» AQ basqarma tóraǵasy Ómirzaq Shókeev qatysty. Óziniń kirispe sózinde ol elorda qonaqtaryna Qazaqstannyń mádenı birligi men ekonomıkalyq serpininiń aıryqsha tarıhy týraly aıtyp berdi.
«Qazir biz údemeli tsırflandyrý kezeńine aıaq bastyq, ulttyq kompanııalarymyzǵa jańa tehnologııalyq jetistikterdi engizýdemiz jáne tsıfrlyq ekonomıkany daıyndaýmen aınalysyp jatyrmyz. Sondyqtan jyl saıynǵy otyrystyń bıylǵy taqyryby - "Naryqtardyń jańa baǵyttaryn zerdeleý" - atalǵan múmkindikter men talpynystardy tolyq aıqyndaıdy», - dep atap ótti Ómirzaq Shókeev.
Ol otyrystyń kún tártibiniń alǵashqy bóligi jańa naryqtar men ınvestıtsııalar týraly bilimmen almasýǵa arnalǵanyn atap aıtty. Kún tártibiniń ekinshi bóligi Qazaqstandy «Samuryq-Qazyna» arqyly baǵdarlaýǵa múmkindik beredi.
