Saǵyntaev eston bıznesmenderin Astana Hub-ta jumys isteýge shaqyrdy
«Qazirgi tańda Qazaqsan Ortalyq Azııada ınvestıtsııalyq klımaty boıynsha birinshi orynda. Ortalyq Azııaǵa salynyp jatqan ınvestıtsııalardyń 70 paıyzy Qazaqstannyń úlesinde. Sońǵy 10 jylda elimizge 250 mlrd dollar sheteldik ınvestıtsııa salynǵan. Biz ekonomıkamyzdyń túrli sektoryna, ásirese shıkizattyq emes eksport pen óńdeý ónerkásibine salynyp jatqan ınvestıtsııalardy qýana qarsy alamyz», - dedi Premer-mınıstr Qazaqstan-Estonııa bıznes-forýmynda.
Úkimet basshysy óz sózinde Qazaqstan Tórtinshi ónerkásiptik tóńkeris elementterin 3D-prıntıng, onlaın-saýda, mobıldi bankıng, tsıfrly qyzmetter, avtomattandyrý, robottandyrý, jasandy ıntellektini engizýdi maqsat tutyp otyrǵanyn atap ótti.
«Premer-Mınıstr myrza (ıÝrı Ratasa - avt.) búgin agroónerkásiptik salada yntymaqtastyqty nyǵaıtý týraly usynys bildirdi. Qazir ǵana biz mınıstrlikterimizge osy másele boıynsha kezdesý uıymdastyryp, osyny keńesý jóninde tıisti tapsyrma berdik. Bálkim, agroónerkásiptik keshende bizdiń baılanystarymyzdy damytýda yntymaqtastyq týraly tıisti memorandýmǵa qol jetkizermiz. Sonymen birge, tsıfrlandyrý máselelerin talqylap, Eýropa elderine bizdiń aýyl sharýashylyǵy ónimderin jetkizý jaıyn da qarastyrýǵa bolady», - deıdi Baqytjan Saǵyntaev.
Úkimet basshysy Astana Hub halyqaralyq ortalyǵynyń jumys jospary týraly da atap ótti.
«Erteń biz Astana Hub ІT-startaptardyń halyqaralyq ortalyǵynyń jumysyn bastaımyz. Atalǵan startap-habtyń tanystyrylymyna qatysýǵa nıet bildirgen Estonııa Premer-Mınıstrine alǵysymdy aıtqym keledi. Erteń Memleket basshysy qatysatyn ol sharaǵa birge bolatyn boldyq. Astana Hub ortalyǵynda bıznesti damytýǵa arnalǵan barlyq múmkindikter jasalǵan. Biz Astana Hub ortalyǵynyń barlyq sheteldik qatysýshylary úshin eńbek jáne vızalyq rejimdi jeńildettik. Qazirgi tańda tehnoparktiń rezıdentteri úshin salyq salýdy jeńildetý boıynsha jumys júrgizilýde. Búgingi tańda biz barlyq tilek bildirýshilerge startap-hab aýmaǵynda birge jumys isteýge daıyn ekenimizdi bildirdik. Kelip tirkelýlerińizge bolady. Bizge kelseńizder, biz tıisti granttarmen qamtamasyz etemiz. Eger baspana máselesi boıynsha suraq týyndasa, biz ol jaǵyn da retke keltiremiz», - dedi Premer-mınıstr.
Onyń aıtýynsha, Astana Hub aımaqtyq ınnovatsııalyq ortalyq retinde tehnologııalyq bastamalardy júzege asyratyn bolady.
«Barlyq estondyq kompanııalardy Astana Hub-ty óz bıznesin belsendi júrgizýge bolarlyq alań retinde qarastyrýǵa shaqyramyz», - dedi Úkimet basshysy.
Eske sala ketsek, atalmysh jıynda QR Premer-Mınıstri Baqytjan Saǵyntaev «Doing Business» reıtınginde Qazaqstannyń kóterilýine serpin berer basymdyqtardy ataǵan bolatyn.
