Saǵyntaev emhanalardaǵy MÁMS jumysymen tanysty

ALMATY. QazAqparat – Almaty qalasynyń ákimi Baqytjan Saǵyntaev emhanalardaǵy mindetti áleýmettik medıtsınalyq saqtandyrý júıesiniń jumysymen tanysty, dep habarlaıdy QazAqparat tilshisi.

Qala basshysy Ortalyq qalalyq klınıkalyq aýrýhana men №4 qalalyq emhanaǵa baryp, emdeý mekemeleriniń MÁMS júıesi boıynsha qalaı jumys istep jatqanyn tekserdi.

Saǵyntaev jańa júıe boıynsha medıtsınalyq kómek kórsetý jumysymen tanysty.

Aqparattyq júıe men medıtsınalyq qyzmetkerlerdiń daıyndyǵyn, patsıentterdiń bul júıege degen pikirin tyńdady. Medıtsınalyq uıymdarda qoldaý qyzmetteri jumys isteıdi. Onda turǵyndarǵa emhanaǵa tirkelýge jáne MÁMS júıesiniń qatysýshysy bolýǵa kómek kórsetiledi. Sondaı-aq, MÁMS-ke tólem júrgizý úshin termınaldar sany artatyn bolady.

Aǵymdaǵy jyldyń 31 naýryzyna deıin barlyq qazaqstandyqtar shartty túrde saqtandyrylǵan dep eseptelip, mártebesine qaramastan MÁMS sheńberinde medıtsınalyq kómekke júgine alady. 1 sáýirden bastap barlyq azamattar saqtandyrylýy tıis. Óıtkeni medıtsınalyq qyzmetterdiń tolyqtyǵy men sapasy osyǵan baılanysty bolmaq.

«Almatylyqtardy densaýlyqqa qatysty mańyzdy máseleni keıinge qaldyrmaı, emhanaǵa júginýge shaqyramyn», – dep jazdy B.Saǵyntaev óziniń resmı Instagram paraqshasynda.

MÁMS-ti engizý protsesine qalalyq shtab jetekshilik etedi. Týyndaǵan suraqtar boıynsha [phone] telefonyna jáne 1406 nómirine respýblıkalyq Call-ortalyǵyna habarlasý qajet.