Saǵyntaev: Elshiler elge ınvestıtsııa tartý máselesin aıryqsha nazarda ustaýy tıis
ASTANA. QazAqparat - Qazaqstannyń sheteldegi elshileri elge ınvestıtsııa tartý máselesin aıryqsha nazarda ustaýy tıis. Bul týraly búgin Úkimettiń selektorlyq rejımdegi otyrysynda elimizdiń Premer-Mınıstri Baqytjan Saǵyntaev aıtty, dep habarlaıdy QazAqparat.
«Qazir ǵana Memleket basshysy habarlasyp, Japonııa men Koreıaǵa saparynan keıin ınvestıtsııalyq ahýalǵa qyzyǵýshylyq tanytty. Japonııanyń da, Koreıanyń da iri bıznesi tarapynan elimizge qyzyǵýshylyqtyń joǵary ekendigin aıtty. Sondyqtan bul jumystardy kúsheıtýimiz qajet»,- dedi Saǵyntaev.
Osy rette Úkimet basshysy elimizge sheteldik ınvestıtsııa tartý úshin KAZNEX INVEST-tiń» jáne Qazaqstan elshilikteriniń jumysyn kúsheıtý qajettigin basa aıtty.
«Erlan Ábilfaıyzuly (QR Syrtqy ister mınıstri Ydyrysov) barlyq elshiler elimizge ınvestıtsııa tartý baǵytyna jiti nazar aýdaryp, jumys isteýleri qajet. Elshilerdiń birinshi kezektegi jumysy osy jáne suraý bolady. Ózińizdiń vedomstvońyzdyń ishinde de osyndaı jumys júrgizińiz. Sodan keıin taǵy bir bas qosyp, jumysymyzdyń qorytyndysyn Memleket basshysyna baıan etetin bolamyz», - dedi Premer-Mınıstr.
Óz kezeginde Syrtqy ister mınıstri barlyq elshiler ekonomıkalyq blokta jumys isteýge basa nazar aýdaryp otyrǵandyǵyn aıtty.
«Biz Investıtsııalar jáne damý mınıstrligimen birlesip, sizge ınvestıtsııalyq shtab boıynsha usynys engizdik. Onda júıequraýshy úsh másele bar, ony sizben birge talqylaǵymyz keledi. Onyń ishinde ulttyq saýda saıasaty men jekeshelendirý máselesi bar. Ózińiz de biletindeı, Japonııa men Koreıaǵa sapary barysynda Memleket basshysy jekeshelendirý máselesine aıryqsha nazar aýdardy. Sondyqtan bul jerde kásibı turǵyda aqparattyq toptama ázirleý qajettigi týyndaýda jáne ony júzege asyrýdyń kelisilgen algorıtmi bolýy tıis»,- dedi Ydyrysov.
