Saǵyntaev «Ekspo-2017» jańa tehnologııalaryn engizý máseleleri jóninde keńes ótkizdi

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev «Ekspo-2017» halyqaralyq kórmesinde usynylǵan jańa tehnologııalardy engizý máseleleri jóninde keńes ótkizdi, dep habarlaıdy primeminister.kz.

Keńes barysynda «Ekspo-2017» jańa tehnologııalaryn ǵylym, aýyl sharýashylyǵy, aqparat jáne kommýnıkatsııalar, temir jol salasynda, turǵyn úı-kommýnaldyq sharýashylyǵy, azamattyq avıatsııa, sondaı-aq, qorǵanys jáne aeroǵarysh ónerkásibinde qoldaný máseleleri talqylandy. QR Bilim jáne ǵylym mınıstrligi men QR Energetıka mınıstrliginiń júrgizgen jumystary týraly aqparat tyńdaldy.

Aıta keteıik, barlyq salalar boıynsha usynylǵan jańa tehnologııalardyń derekter bazasy qurylǵan, yntymaqtastyq týraly tıisti memorandýmdarǵa qol qoıylǵan jáne jeke, avtorlarmen jáne ınvestorlarmen birlesken jobalar pysyqtalyp jatyr.

QR Energetıka mınıstrligi ulttyq kompanııalardan sarapshylardy tartý arqyly jumys tobyn qurǵan. Kórmeden 105 sheteldik jáne 28 otandyq tehnologııalar iriktelip alynǵan.

Ulttyq kompanııalar 25 tehnologııany, óńirlerdiń ákimdikteri - 85 tehnologııany tańdap alǵan. Arnaıy jol kartalary ázirlenip, bekitilgen. Munaı jáne gaz salasynda 25 jobany, elektr energetıkasynda - 24, kómir salasynda - 5 jáne ekologııa salasynda - 36 jobany iske asyrý josparda bar.