Saǵyntaev Ekonomıkany jańǵyrtý jónindegi komıssııa otyrysyn ótkizdi
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen QR ekonomıkasyn jańǵyrtý jónindegi memlekettik komıssııanyń otyrysy ótti. Bul týraly primeminister.kz habarlaıdy.
Otyrys barysynda 2016-2020 jyldarǵa arnalǵan jekeshelendirý baǵdarlamasyn iske asyrý máseleleri, sondaı-aq, óńdeý ónerkásibi salasyndaǵy kásipkerlik sýbektilerin damytý máseleleri talqylandy. Atap aıtqanda, jumys toptarynyń kvazımemlekettik sektor obektilerin ótkizý jáne satý aldyndaǵy daıyndyq ádisteri men tásilderi týraly usynystary qaraldy.
Budan ózge, Memlekettik komıssııa Prezıdenttiń Bes áleýmettik bastamasy aıasynda iske asyrylyp jatqan «Saryarqa» magıstraldi gaz qubyrynyń qurylysy» ınvestıtsııalyq jobasyn jáne «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵynyń ınfraqurylym nysandarynyń qurylysy jobasyn odan ári qarjylandyrý jónindegi tásilderdi maquldady.
