Saǵyntaev Ekonomıkalyq saıasat jónindegi keńes otyrysyn ótkizdi
ASTANA. QazAqparat -Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen Ekonomıkalyq saıasat jónindegi keńes otyrysy ótti. Bul týraly primeminister.kz habarlaıdy.
Otyrys barysynda naqty ýaqyt rejıminde tólemderdi qoldaýǵa jáne onyń negizinde mobıldi tólemderdi engizýge yqpal etetin bankaralyq esepter júıesin jetildirý máseleleri talqylandy.
Óz sózinde QR Ulttyq bankiniń tóraǵasy D. Aqyshev elektrondy kommertsııa, tsıfrlyq bankıng, «aqyldy qalalar» men ıntellektýaldy júıelerdi damytýdyń negizi sanalatyn onlaın tólem ınfraqurylymyn damytýdyń tásilderi týraly aıtyp berdi.
Keńes barysynda ulttyq ekonomıka mınıstri T. Súleımenov, qarjy mınıstri B. Sultanov, ınvestıtsııalar jáne damý mınıstri J. Qasymbek, aqparat jáne kommýnıkatsııalar mınıstri D. Abaev, «Qazaqtelekom» AQ basqarma tóraǵasy Q. Esekeev, «Qazposhta» AQ basqarma tóraǵasy S. Sársenov sóz sóıledi.
