Saǵyntaev: Eki myń almatylyq páter alý úshin turǵyn úı sertıfıkatyna ıe bolady
ALMATY. QazAqparat - Baqytjan Saǵyntaev «Almaty» telearnasynyń Akimat LIVE baǵdarlamasynyń tikeleı efırinde páter kezeginde turǵan qalalyqtarǵa beriletin turǵyn úı sertıfıkattary jóninde aıtty, dep habarlaıdy QazAqparat tilshisi.
Eki myń azamattyń alǵashqy tólemniń bir bóligin jabýy úshin turǵyn úı sertıfıkattaryn berý maqsatynda jergilikti bıýdjetten 2 mlrd teńge bólindi.
Qalalyq máslıhat bıylǵy jyldyń 31 mamyrynda turǵyn úı kezegine turǵandarǵa tegin jáne qaıtarymsyz negizde turǵyn úı sertıfıkattarynyń mólsherin 1 mln teńge kóleminde anyqtady, bular tómendegi sanattaǵylar:
- I jáne II toptaǵy múgedekter;
- múgedek balasy bar nemese ony tárbıelep otyrǵan otbasylar;
- jetim balalar jáne ata-ananyń qaraýynsyz qalǵan balalar;
- kópbalaly otbasylar.
Sertıfıkattardy «Nurly jer» memlekettik baǵdarlamasy aıasynda «Shańyraq» (5-10-20) jáne Baqytty otbasy (2-10-20) baǵyttary boıynsha paıdalanýǵa bolady.
Búginde bul sheshim qalalyq Ádilet basqarmasynda tirkelýde. Ótinishterdi qabyldaý sheshim tirkelgennen keıin bastalady jáne Almatynyń Turǵyn úı saıasaty basqarmasy arqyly júzege asyrylady. Qabyldaýdyń bastalǵany týraly aqparatty Basqarmanyń veb-saıtynan qadaǵalaý kerek.
«Sertıfıkat alý úshin «Otbasy banki» AQ-da tólem qabilettiligin aldyn ala baǵalaýdan ótken qalalyqtar «Turǵyn úı sertıfıkattaryn berý» memlekettik qyzmet kórsetý standartyna saı ótinishpen jáne qujattarmen júginedi.
Onyń ishinde: belgili formadaǵy ótinish, ótinish berýshiniń jáne otbasy músheleriniń jeke basyn kýálandyratyn qujattar, sońǵy 6 aıdaǵy kirister týraly esep, jumys ornynan anyqtama, bankten turǵyn úı zaemyn berýdi maquldaǵan hat qajet»,- dedi ákim.
Úmitkermen turǵyn úı sertıfıkatyn berý týraly kelisimge qol qoıylsa, onda turǵyn úı sertıfıkatynyń belgilengen mólsheri ótinish berýshiniń esepshotyna aýdarylady.
Turǵyn úı sertıfıkaty turǵyn úı zaemyn berýge kelisim alǵan, sońǵy 6 aıdaǵy kirisi otbasynyń árbir múshesi úshin 106 336 teńgeden aspaıtyn qala turǵyndaryna beriledi.
2021 jyldyń 1 maýsymyndaǵy jaǵdaı boıynsha qalada turǵyn úıge muqtaj jobada qarastyrylǵan sanattar boıynsha 9 136 azamat tirkelgen, olar:
- I jáne II toptaǵy múgedekter – 2 726;
- múgedek balalary bar nemese olardy tárbıelep otyrǵan otbasylar – 1 443 ;
- jetim balalar men ata-anasynyń qamqorlyǵynsyz qalǵan balalar – 1 879 ;
- kópbalaly otbasy – 3 088.
