Saǵyntaev DDSU bas dırektorymen densaýlyq saqtaý júıesin jetildirý máselelerin talqylady
ASTANA. QazAqparat - Astanada Qazaqstan Respýblıkasynyń Premer-Mınıstri Baqytjan Saǵyntaev Qazaqstanǵa 25-26 qazan kúnderi ótetin Medıtsınalyq-sanıtarlyq alǵashqy kómek (MSAK) jónindegi jahandyq konferentsııaǵa qatysý úshin kelgen Dúnıejúzilik densaýlyq saqtaý uıymynyń bas dırektory Tedros Gebreıesýspen kezdesý ótkizdi, dep habarlaıdy QazAqparat primeminister.kz silteme jasap.
Kezdesý barysynda álemde densaýlyq saqtaý júıesin damytýǵa, medıtsınalyq qyzmetter men bilimniń sapasy men qoljetimdiligin arttyrýǵa, sondaı-aq densaýlyq saqtaý ınfraqurylymyn jetildirý aıasynda zamanaýı tsıfrlyq tehnologııalardy engizýge qatysty ózara is-qımyl jáne ortaq tásilderdi ázirleý máseleleri talqylandy.
B. Saǵyntaev T. Gebreıesýs myrzaǵa Alǵashqy medıtsınalyq-sanıtarlyq kómek jónindegi Almaty deklaratsııasy qabyldanǵan kúnnen beri 40 jyl ótýine oraı ótkizilgeli jatqan Jahandyq konferentsııany uıymdastyrýǵa kórsetken qoldaýy úshin alǵys aıtyp, osyndaı mańyzdy qorytyndy qujat qabyldanatynyna senim bildirdi.
1978 jyly Almaty qalasynda álemdegi densaýlyq saqtaý salasyn damytýǵa eleýli áser etken Alǵashqy medıtsınalyq-sanıtarlyq kómek jónindegi Almaty deklaratsııasy qabyldandy. Atalǵan aýqymdy sharanyń arqasynda Qazaqstannyń álemdik densaýlyq saqtaý qoǵamdastyǵy aldynda bedeli artty.
Elimiz Dúnıejúzilik densaýlyq saqtaý uıymyna 1992 jyldyń 19 tamyzynda, uıymnyń 180-múshesi bolyp qosyldy. Qazaqstan geografııalyq jaǵynan DDSU-nyń Eýropalyq aımaǵyna jatady. Búginde DDSU músheleriniń sany 194 memleketke jetti.
Qazirgi tańda Qazaqstan men DDSU arasynda tyǵyz seriktestik qatynastar qalyptasqan. DDSU sharalary aıasynda juqpaly emes jáne juqpaly aýrýlarmen, ásirese polıomıelıtpen, týberkýlezben kúres jáne halyqaralyq densaýlyq saqtaý erejelerin jan-jaqty nasıhattaý boıynsha qarqyndy jumys atqaryldy. DDSU ana men bala densaýlyǵyn qorǵaý, týberkýlez jáne AITV/JITS aldyn-alý jáne baqylaý, sanıtarlyq qyzmet kórsetýdi jaqsartý sekildi memlekettik saıasatty júzege asyrýda Qazaqstanǵa turaqty tehnıkalyq jáne konsýltatsııalyq kómek kórsetip keledi. Densaýlyq saqtaý salasyndaǵy turaqty damý boıynsha kózdegen maqsattarǵa jetý úshin kóp jumys jasalýda.
