Saǵyntaev byltyrǵy kómir tapshylyǵy jaıynda: Barlyǵy qoldan jasalǵan
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵyntaev ortalyq jáne jergilikti atqarýshy organdarǵa aldaǵy ýaqytta kómir tapshylyǵyn boldyrmaýdy qatań tapsyrdy, dep habarlaıdy QazAqparat tilshisi.
«Jylytý kezeńi jalpy turaqty ótti. Endi barshamyz ortalyq jáne jergilikti atqarýshy organdar aldaǵy kúzgi, qysqy kezeńge daıyndyqty bastaýymyz qajet. Baıandamalardan kórip otyrmyz, qajetti jumystar bastalǵan. Degenmen, Energetıka, Investıtsııalar jáne damý mınıstrlikterine jylytý kezeńine daıyndyqtardy oryndaý barysyna monıotrıng júrgizýdi tapsyramyn. Ákimder jylýmen, energııamen jabdyqtaýdyń, kommýnaldyq sektor men áleýmettik salanyń barlyq nysandaryna josparlanǵan jóndeý jumystaryn qamtamasyz etsin», - dep atap ótti Úkimet basshysy.
Sonymen qatar Baqytjan Saǵyntaev mınıstrler men oblys ákimderine aldaǵy ýaqytta kómir tapshylyǵyn boldyrmaýdy qatań tapsyrdy.
«Byltyrǵy jyly bolǵan keleńsiz jaǵdaılardy qaıtalamaýymyz qajet. Onyń barlyǵy qoldan jasalǵan. Bizdiń baqylaýymyzdyń tómendiginen bolǵan jaǵdaı. Qazaqstanda kómir óte mol kólemde óndiriledi. Tek ózimizge ǵana emes syrtqa da shyǵaryp jatyrmyz. Al byltyrǵy keleńsiz jaǵdaı qaıtalanbaýy qajet», - dep atap ótti Baqytjan Saǵyntaev.
Osy rette Úkimet basshysy óńir ákimderi men QR Energetıka mınıstri Qanat Bozymbaevqa kómir máselesine turaqty monıtorıng júrgizip otyrýdy tapsyrdy.
«Qanat Aldabergenuly, bul máselege bas nazar aýdaryp, turaqty monıtorıng júrgizýdi tapsyramyn. Tımýr Muratuly (QR Ulttyq ekonomıka mınıstri) kómir baǵasynyń negizsiz ósýi men alypsatarlyq elementterge jol bermeýdi monopolııaǵa qarsy sharalar arqyly baqylaýdy tapsyramyn. Bul jumysty Asqar Uzaqbaıuly (QR Premer-Mınıstriniń birinshi orynbasary) baqylaýǵa alyńyz», - dedi Úkimet basshysy.
