Saǵyntaev BRT jáne LRT jelileriniń qurylysy týraly aıtty

ALMATY. QazAqparat – Almaty ákimi Baqytjan Saǵyntaev Ortalyq kommýnıkatsııalar qyzmetinde ótken brıfıng barysynda júrdek avtobýstar jelisi (BRT) men júrdek tramvaı (LRT) jelisin salý týraly aıtty, dep habarlaıdy QazAqparat tilshisi.

«BRT jelisine kelsek, onyń marshrýty belgili. Tımırıazev pen Jeltoqsan kóshesindegi jeli ary qaraı Tóle bı, Shyǵys aınalma jolyna deıin sozylady. Bul másele qoǵamdyq talqylaýǵa shyǵaryldy. Qazir osy baǵyttaǵy jasalǵan jumysqa qatysty talqylanatyn másele kóp. Álbette jobany iske qospas buryn jergilikti turǵyndardyń pikirin eskeremiz», - dedi ákim.

Ol sondaı-aq, LRT jelisi týraly aıtty.

«LRT jelisi alańyn daıyndaý jumysy áli aıaqtalmady. Qazir qarajat máselesin qarastyryp jatyrmyz. Atap aıtqanda, sheteldik qarjy uıymdarymen baılanysyp jatyrmyz. Qalalyq bıýdjetke barynsha tıimdi jaqtary qarastyrylýda. Álbette nesıe dollar valıýtasynda bolsa, bıýdjetke kúsh túsetini anyq. Biz qalaısha bul júktemeni kóterip júre alamyz? Jobany tolyq qolǵa almas buryn qarjylyq modelin oılastyryp alǵanymyz durys», - dedi ákim.

Ákim sonymen qatar, Shyǵys jáne Batys jańa vokzaldary týraly aıtty.

«Shyǵys pen Batys vokzaldarynyń jumysy toqtamaıdy. Burynǵy Saıahat avtovokzaly mańynda jekemenshik ıesiniń qyzyǵýshylyǵy paıda boldy. Bul jobany eki jaqtap ıgeretin bolsaq, ınvestorlar osy nysannyń, kólik habynyń ıesi bolady. Kólik habyn qurýǵa kirisetin bolady. BRT jobasyna arnaıy depo kerek. Talǵardan kelgen jolaýshylar otyryp ketýi úshin», - dedi ákim.

Buǵan deıin ákim Talǵar men Almaty arasyndaǵy keptelisti qalaı sheshýge bolatynyn aıtqan.