Saǵyntaev bıznesti jáne óńdeý ónerkásibin damytý máseleleri jóninde keńes ótkizdi
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen shaǵyn jáne orta bıznes pen óńdeý ónerkásibin damytý máseleleri jóninde keńes ótti, dep habarlaıdy primeminister.kz.
Keńes barysynda óńdeý ónerkásibi ónimine ishki suranysty yntalandyrý, óńdeý ónerkásibiniń básekege qabilettiligi men eksportqa baǵdarlanýyn arttyrý, sondaı-aq jappaı kásipkerlikti odan ári damytý sharalary qaraldy.
2010 jyldan bastap júzege asyrylyp jatqan ındýstrııalandyrý saıasaty aıasynda qoldaý kórsetýdiń tıisti ınfraqurylymy men negizgi jaǵdaılary jasaldy. Bul óńdeý ónerkásibi kásiporyndarynyń sanyn 3,4 myń sýbektige - 14,2 myńǵa deıin ulǵaıtýǵa múmkindik berdi.
Kún tártibi boıynsha Investıtsııalar jáne damý mınıstri J. Qasymbek, Ulttyq ekonomıka mınıstri T. Súleımenov jáne «Atameken» ulttyq kásipkerler palatasynyń basqarma tóraǵasy A. Myrzahmetov baıandama jasady.
