Saǵyntaev Belarýs eline jumys saparymen barady
ASTANA. QazAqparat - Bıyl qazan aıynda TMD memleketteri Úkimet basshylarynyń keńesine qatysý úshin QR Premer-Mınıstri Baqytjan Saǵyntaevtyń Belarýs Respýblıkasyna jumys sapary bolady.
Bul týraly búgin QR Syrtqy ister mınıstrliginde ótken brıfıngte Qazaqstannyń Belarýs Respýblıkasyndaǵy Elshisi Erǵalı Bólegenov málim etti.
Elshiniń aıtýynsha, sapar barysynda Qazaqstan men Belarýs elderiniń ekijaqty kezdesýleri ótkiziledi dep kútilýde.
«Onyń ishinde ǵarysh salasyndaǵy áriptestikti damytý máselelerine qatysty ýaǵdalastyq. Kelisim daıyndyq ústinde. Bul - úkimetaralyq kelisim. Beıbit maqsatta ǵaryshtyq qyzmetti birlesip damytý týraly bolady. Sonymen qatar bolashaq jyldarǵa arnalǵan ekonomıkalyq seriktestik baǵytyndaǵy birqatar qujattarǵa qol qoıylady. Ol úlken bir baǵdarlama bolady. Onyń ústine ekijaqty qarym-qatynastardyń mashına jasaý salasyndaǵy úlken serpindi jobasy bar. Ol joba da qazir daıyndyq ústinde», - dedi E. Bólegenov.
