Saǵyntaev bas dárigerlerge COVID-19-pen kúresýge daıyndyqty kúsheıtýdi tapsyrdy
ALMATY. QazAqparat – Almaty ákimi Baqytjan Saǵyntaevtyń tóraǵalyǵymen qalanyń qoǵamdyq densaýlyq basqarmasynyń alqa keńesi ótti. Jıynda 9 aıda densaýlyq saqtaýdy damytýdyń memlekettik baǵdarlamasyn júzege asyrýdyń qorytyndysy qaraldy jáne COVID-19-ben kúresti kúsheıtý boıynsha mindetter qoıyldy, dep habarlaıdy QazAqparat tilshisi.
Keńestiń jumysyna bilim jáne sport basqarmasy, «Respýblıkalyq elektrondyq densaýlyq saqtaý ortalyǵy», «SQ Farmatsııa» fılıaly, memlekettik jáne jeke medıtsınalyq mekemelerdiń basshylary qatysty.
«Respýblıkalyq elektrondyq densaýlyq saqtaý ortalyǵy» Almaty qalasy fılıalynyń dırektory G.Ysqaqovanyń aıtýynsha, 9 aıdyń qorytyndysy boıynsha densaýlyq saqtaýdy damytýdyń 2020-2025 jyldarǵa arnalǵan memlekettik baǵdarlamanyń negizgi kórsetkishteri júzege asyrylǵan.
«100 myń adamǵa shaqqanda 25,3 oqıǵany quraıtyn týberkýlez aýrýy 30%-ǵa tómendedi. Jol-kólik oqıǵalary saldarynan bolatyn ólim-jitim eki esege jýyq azaıyp, 100 myń turǵynǵa shaqqanda 5,83 oqıǵa tirkeldi»,– dedi ol.
Onyń aıtýynsha, Almatyda naýqastardyń medıtsınalyq kómektiń sapasyna qanaǵattanýy 51,6% bolǵan. Bul kórsetkish 2019 jyldyń osy kezeńimen salystyrǵanda 5,5% -ǵa joǵary. Ol buqarany dene shynyqtyrýmen jáne sportpen jappaı qamtý, ana óliminiń deńgeıin tómendetý, medıtsınalyq mekemelerdiń materıaldyq-tehnıkalyq bazasyn jaqsartý úshin jumysty barynsha kúsheıtý qajettigin atap ótti.
Almatyda 74 memlekettik medıtsınalyq uıym, 13 respýblıkalyq jáne ÁMSQ-men kelisimi boıynsha 89 jeke uıym halyqqa medıtsınalyq qyzmetti kórsetedi. Onda 8 319 dáriger men 14 613 orta medıtsınalyq qyzmetker jumys isteıdi.
Óz kezeginde, «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Almaty qalasy fılıalynyń basshysy Tileýhan Ábildaev qalalyq densaýlyq saqtaý sýbektileri men qor arasyndaǵy kelisimshart mindettemeleriniń oryndalǵany týraly habarlady.
Almatynyń qalalyq densaýlyq basqarmasy bastyǵynyń mindetin atqarýshy J. Madeeva bas dárigerlerdiń naýqastardy erte anyqtaý men emdeýdegi jumysyn baǵalaýdyń nátıjesi jáne medıtsınalyq mekemelerdi KVI pandemııasynyń ekinshi tolqynyna daıyndaý boıynsha qabyldanǵan shara týraly baıandady.
Almaty ákimi Baqytjan Saǵyntaev aýrýhanalar men emhanalardy pandemııamen kúreske daıyndaý jónindegi is-shara josparynyń oryndalýyn baqylaýdy kúsheıtýdi tapsyrdy. Vırýstyń taralýyn boldyrmaý úshin sanıtarlyq-epıdemıologııalyq talaptyń saqtalýyna jáne personal men naýqastardyń qaýipsizdigin qamtamasyz etýge erekshe nazar aýdarý qajet.
Sonymen birge, qala ákimi medıtsınalyq mekemelerdiń birinshi basshysynyń biliktiligin arttyrý, menedjerlik sheberlik pen tsıfrlyq saýattylyqty damytý qajettiligine nazar aýdardy.
