Saǵyntaev Aýǵanstannyń atqarýshy bıliginiń basshysymen kezdesti
ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev Qazaqstanǵa jumys saparymen kelgen Aýǵanstan Islam Respýblıkasynyń atqarýshy bıliginiń basshysy Abdýlla Abdýllamen kezdesý ótkizdi, dep habarlaıdy primeminister.kz.
Kezdesý barysynda saýda-ekonomıkalyq yntymaqtastyqty odan ári damytý máseleleri jáne 2015 jylǵy qarashada Aýǵanstan prezıdenti A. Ganıdiń Astanaǵa sapary barysynda eki memlekettiń Basshylary jasasqan kelisimderdiń iske asyrylý barysy talqylandy.
Sondaı-aq, óńirdiń tranzıttik áleýetin jaqsartý sharalary men temir joldar salý salasyndaǵy ekijaqty yntymaqtastyq perspektıvalary qaraldy. Budan ózge, eki eldiń bilim berý salasyndaǵy ózara is-qımylyn jalǵastyrý máselesi kóterildi.
Baqytjan Saǵyntaev Abdýlla Abdýllany ulttyq merekesi - Aýǵanstan Islam Respýblıkasynyń Táýelsizdik kúnimen quttyqtady. Oǵan qosa, taraptar Astanada ótip jatqan EKSPO-2017-degi Aýǵanstannyń Ulttyq kúnin talqylady.
Anyqtama:
Qazaqstan men Aýǵanstan Islam Respýblıkasy arasyndaǵy taýar aınalymy 2016 jyldyń qorytyndysy boıynsha 489,4 mln dollardy qurady, onyń ishinde eksport - 486,8 mln, ımport - 2,5 mln. 2017 jylǵy qańtar-mamyrda taýar aınalymy 195,8 mln dollardy qurady, onyń ishinde eksport - 195,2 mln, ımport 0,6 mln.
