Saǵyntaev Atyraý oblysyndaǵy balyq ósirý kásipornynda boldy
ASTANA. QazAqparat - Búgin Atyraý oblysyna jumys sapary aıasynda QR Premer-Mınıstri Baqytjan Saǵyntaev memlekettiń qoldaýymen iske qosylǵan Caspian Royal Fish bekire balyǵyn ósirý keshenin aralady jáne ony odan ári damytý, onyń ishinde óndiristi jańǵyrtý aıasyndaǵy perspektıvalarmen tanysty, dep habarlaıdy primeminister.kz.
QR Premer-Mınıstri óndiristik keshen ǵımaratyn aralap, tuıyq sýmen qamtý júıesinde bekire tuqymdas balyqtardy ósirý protsesimen tanysty, sondaı-aq ınkýbatsııalyq tseh pen balyqty qysta ustaý zalyn qarap shyqty. Balyq ósirý kesheniniń dırektory Asqar Taýbaev Baqytjan Saǵyntaevqa kásiporynnyń aǵymdaǵy qyzmeti men osy jerde óndiristi jańǵyrtýdy júrgizý perspektıvalary týraly málimet berdi.
2014 jyldan bastap jumys jasaıtyn «Caspian Royal Fish» JShS balyq ósirý kesheni jasandy ósirýmen jáne bekire tuqymdas taýarlyq balyqty qaıta óńdeýmen, sondaı-aq as ýyldyryǵyn óndirýmen aınalysady.
Óziniń qalyptasý kezeńinde kásiporyn memleket tarapynan qoldaýǵa eki márte júgindi. Qural-jabdyqtar satyp alýǵa «QazAgroQarjy» AQ arqyly nesıelendirý aıasynda jáne ınjenerlik-kommýnıkatsııalyq ınfraqurylym qurylysyna «Bıznestiń jol kartasy - 2020» baǵdarlamasy boıynsha.
Eske salsaq, Memleket basshysynyń tapsyrmasyna sáıkes Qazaqstannyń strategııalyq maqsattarynyń biri - 2050 jylǵa qaraı shaǵyn jáne orta bıznestiń eldiń JІÓ-degi úlesin keminde 50% qamtamasyz etý bolyp tabylady. Osyǵan baılanysty QR Úkimeti bıznes úshin barlyq shyǵyndardyń túrlerin jáne memlekettiń ekonomıkaǵa qatysý úlesin azaıtý boıynsha keshendi jumys júrgizýde.
