Saǵyntaev Atyraý ІІD bastyǵyna: Aılyq kóbeımese qylmyspen kúrespeımiz be
ASTANA. QazAqparat - Búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev Atyraý oblystyq ІІD bastyǵy Aıan Dúısenbaevqa adam ómirine nemquraıly qaramaýdy eskertti, dep habarlaıdy QazAqparat tilshisi.
Jıyn barysynda Úkimet basshysy 2018 jyldyń segiz aıynda Atyraý oblysynda asa aýyr qylmystar - 44, adam óltirý - 6,7, tonaý - 42,9, zorlyq jasaý - 6,1 jáne jol-kólik oqıǵalarynda mert bolǵandar sany 43 paıyzǵa artqanyn aıtty. Sonymen qatar Atyraý oblystyq Іshki ister departamentiniń bastyǵy Aıan Dúısenbaevtyń esebin tyńdaǵan bolatyn.
Onyń aıtýynsha, Atyraý oblysynda asa aýyr qylmystar tek qana 1, 2 jáne 3 birlikke ǵana ósken. Degenmen, paıyzǵa shaqqanda kóp bolyp kórinip tur. Máselen, byltyr 25 adam ólimi, bıyl 26 adam ólimi tirkelgen.
«Oblys ortalyǵynda qylmystyń artýyna sebep halyq sanynyń ósýi bolyp otyr. Máselen, sońǵy 5 jylda Atyraý qalasynyń halyq sany 100 myń adamǵa kóbeıgen... Jol-kólik oqıǵalarynyń ósýine qatysty aıtar bolsam, Atyraýda sońǵy 5 jylda kólik sany 96 myńnan 150 myńǵa deıin ósti», - dedi ol.
Osy rette Baqytjan Saǵyntaev bos turǵan 10 paıyz vakansııa qysqartylyp, únemdelgen qarajat jalaqyny kóterýge jumsalatyndyǵyn atap ótti.
«Al, siz kadr jetpeıdi deısiz. Vakansııany qysqartsa qalaı jumys isteısiz?», - dep surady Premer-Mınıstr departament basshysynan.
«Qysqarsa, qyzmetkerlerimizdiń jalaqysy kóbeıedi ǵoı. Júkteme normasy shamaly ósetin bolar. Іsteımiz, shamamyz bar, qadaǵalaımyz. Mınıstrden qandaı sheshim bolady, qoldaımyz», - dep jaýap berdi ol.
«Mınıstrdiń sheshimi qandaı bolady, durys áskerı qyzmetshi ǵoı. Aqsha berse qylmysty toqtatamyz. Al aılyq bermese, aılyqty kóbeıtpese qylmyspen kúrespeımiz. Sizdiń jaýabyńyz týra solaı boldy. Siz adam ómirine qyzyq qaraısyz. Byltyr 25 adam, bıyl 26 adam ólgen deısiz. Bir adam bolsa da ol adamnyń ómiri, jeńildikpen qaraýǵa bolmaıdy», - dep eskertti Baqytjan Saǵyntaev Aıan Dúısenbaevqa.
