Saǵyntaev Astanadaǵy nóser jaıly: 20 jyl boıy atústi qarap kelemiz
ASTANA. QazAqparat - QR Premer-Mınıstri sońǵy kúnderi nóser saldaryna baılanysty elordanyń kommýnaldyq qyzmetteriniń jumysyn kúsheıtýdi tapsyrdy, dep habarlaıdy QazAqparat tilshisi.
Úkimet otyrysy bastalǵanda kún tártibindegi máselelerdi talqylamas buryn Baqytjan Saǵyntaev Astanada jaýǵan nóserdiń saldary týraly sóz qozǵady. Ol atap ótkendeı, sońǵy 1-2 kúnderi tolassyz jaýǵan jańbyrdyń saldarynan birqatar kósheler kólkigen sýdyń astynda qalǵan. Sonyń saldarynan jaıaý júrginshiler jáne avtokólik ıeleri zardap shekken.
«Qoǵamdyq kóliktiń de qozǵalysy qıyndap ketti. Bul másele jóninde Elbasy tarapynan da birneshe ret oryndy syn-eskertýler aıtylǵan bolatyn. Qaladaǵy káriz júıesin túpkilikti sheshý týraly tıisti tapsyrmalar da berilgen. Jalpy, qaladaǵy jaǵdaıǵa tolyq jaýap beretin ol - ákimdik. Ony bárimiz de jaqsy bilemiz. Sol sebepten, tabıǵattyń osyndaı tosyn minezine daıyn bolý úshin, kommýnaldyq qyzmetterdiń jumysynyń tıimdiligi úshin de ákimdik jaýapty ekenin esterińizge salamyn. Qala turǵyndary qalalyq kommýnaldyq qyzmetterdiń nashar jumysynan japa shekpeýi qajet. Bizde Baýyrjan Momyshuly dańǵyly, Turan dańǵyly men Uly Dala kósheleriniń qıylysy, Baraev, Jastar shaǵynaýdanynyń sý astynda qalýy sońǵy kezde qalypty jaǵdaıǵa aınalyp bara jatqan sııaqty», - degen Úkimet basshysy qala ákimi Áset Isekeshevke osy másele boıynsha qysqasha jaýap berýdi surady.
Óz kezeginde Astana basshysy qaladaǵy káriz júıesiniń jumysyn jaqsartý baǵytynda qandaı jumys atqarylyp jatqanyn aıtyp berdi.
Áset Isekeshevtiń jaýabyn tyńdaǵan Baqytjan Saǵyntaev Astanadaǵy avtobýstyń ishine sý kirip ketken jaǵdaıdy eske saldy.
«Birinshi kezekte sý kólkıtin kóshelerde aldyn ala jumystardy atqaryp, tazalap qoıý qajet. Jurtshylyqtyń aıtyp otyrǵany máselesi - osy. Káriz júıelerin, sý jınalatyn qudyqtardy da der kezinde tazalaý máselelerin qolǵa alyp, ár jaýyn jaýǵan saıyn sý astynda qalatyn aımaqtarda jaǵdaı qaıtalanbas úshin keshendi sharalardy daıyndaý kerek. Ótken aptada siz Astana qalasynyń bes jyldyq keshendi josparynyń baǵdarlamasyn aıtyp óttińiz. Ony Elbasyna da daıyndadyńyz. Biraq, sonyń ishinde osy jaýyn-shashynnan keıin bolatyn kárizdiń jumysyna basa nazar aýdarý kerek. Asqar Uzaqbaıuly (Mamın - avt.), keshendi jospardy Úkimetke shyǵarǵanǵa deıin taǵy da bir qarap shyǵyńyz. 20 jyl boıy bul máselege atústi qarap keldik dese de bolady. Jaýyn ótkennen keıin bári de umytylyp qalyp jatyr», - dep túıdi Úkimet basshysy.
