Saǵyntaev: «Astana» HQO ashqanymyzdy abyroımen jarııalaý kerek
ASTANA. QazAqparat - QR Premer-Mınıstri Baqytjan Saǵyntaev osy aıdyń ishinde «Astana» halyqaralyq qarjy ortalyǵyn qurýǵa qatysty barlyq máselelerdi retteýdi tapsyrdy, dep habarlaıdy QazAqparat tilshisi.
«Qaırat Nematuly, («Astana» halyqaralyq qarjy ortalyǵynyń basshysy - avt.) bul tek sizge ǵana júktelgen jaýapkershilik emes, bizge de naqty talap qoıyldy. Bes ınstıtýtsıonaldy reforma aıasynda aýqymdy joba qolǵa alynyp otyr. Sondyqtan qatelesýge bolmaıdy. Osy aıdyń aıaǵyna deıin barlyq máselelerdi rettep qoıýymyz kerek. Al 1 qańtarda biz Uly Dalada taǵy bir halyqaralyq qarjy ortalyǵynyń ashylǵanyn jer-jahanǵa jarııalaýymyz qajet», - dep atap kórsetti Baqytjan Saǵyntaev búgin ótken Úkimet otyrysynda.
Premer-Mınıstrdiń aıtýynsha, «Astana» halyqaralyq qarjy ortalyǵyn qurý bastamasy Memleket basshysy Nursultan Nazarbaevtyń jeke baqylaýynda. Osy ýaqytqa deıin biraz sharalar atqaryldy. Endi, ony oıdaǵydaı iske asyrý qajet.
«Biz álem elderin aralap, «Astana» halyqaralyq qarjy ortalyǵy týraly aıtyp júrmiz. Bárin belsene atsalysýǵa shaqyrýdamyz. Álemge tanymal bırjalarmen kelisimder jasadyq. Endi, osynyń bárin oıdaǵydaı iske asyrýymyz qajet», - dep atap kórsetti Úkimet basshysy.
Aıta keteıik, «Astana» qarjy ortalyǵy krıptovalıýtany da saýdalaıdy .
