Saǵyntaev «Arselor Mıttal Temirtaý» AQ-nyń óndiristik nysandaryn aralady
ASTANA. QazAqparat - QR Premer-Mınıstri Baqytjan Saǵyntaev Qazaqstannyń iri ónerkásiptik kásiporyndarynyń biri «Arselor Mıttal Temirtaý» AQ-nyń óndiristik nysandaryn, olardyń ishinde JETs-2 jáne №3 domna peshin aralady, dep habarlaıdy primeminister.kz.
QR energetıka mınıstri Q. Bozymbaev tutynýshylardy jylý jáne elektr energııasymen úzdiksiz qamtamasyz etý boıynsha asa mańyzdy mindetti oryndaý sharalary týraly baıandady. Osy maqsatta JETs-2 qýattaryn jańǵyrtý boıynsha keshendi jospar ázirlenedi.
«Arselor Mıttal Temirtaý» AQ-nyń óndiris jónindegi dırektory Vadım Basın týrbınalyq tseh jáne jalpy stantsııanyń jumysy týraly, stantsııanyń jáne 2017-2018 jyldarǵa jóndeý naýqanynyń negizgi parametrleri týraly baıandady.
Temirtaý qalasynyń ákimi Ǵalym Áshimov qalanyń 2017-2018 jyldarǵa jylý berý maýsymyna daıyndyǵy týraly, onyń ishinde ınjenerlik jelilerdiń, kóp qabatty turǵyn úılerdiń jáne áleýmettik-mádenı nysandardyń daıyndyǵy týraly baıandady.
Budan ózge, QR Premer-Mınıstri Baqytjan Saǵyntaev №3 domna peshindegi shoıyn shyǵarý protsesimen tanysty. «ArselorMıttal Temirtaý» AQ bas dırektory Kalon Paramjıt kompanııanyń qyzmeti jáne damýdyń aldaǵy perspektıvalary jaıly baıandady.
QR Prezıdenti N. Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýyna sáıkes elimizdiń taý-ken metallýrgııa kesheni ekonomıkalyq ósim úshin óziniń strategııalyq mánin saqtap qalýy tıis. Osyǵan baılanysty bul kompanııalarmen jańa naryqtarǵa shyǵý, jetkizý geografııasyn jáne mıneraldy-shıkizattyq bazany keńeıtý boıynsha jumys júrgizý kerek.
