Saǵyntaev ardagerler men chernobyldyqtarǵa gospıtal salý bastamasyna jaýap berdi
ASTANA. QazAqparat - Úkimet basshysy Baqytjan Saǵyntaev soǵys ardagerleri, chernobyldyqtar men Semeı polıgonynan zardap shekkenderge arnap jańa gospıtal salýǵa qatysty depýtattardyń saýalyna jaýap berdi, dep habarlaıdy QazAqparat tilshisi.
Aıta ketsek, buǵan deıin Parlament Májilisiniń depýtaty Baqytbek Smaǵul UOS jáne Aýǵan soǵysy ardagerlerine, Chernobyldegi apat zardaptaryn joıýǵa qatysqan jáne Semeı polıgonynan zardap shekken adamdarǵa laıyqty medıtsınalyq kómek kórsetý úshin jańa gospıtal salý bastamasyn kótergen bolatyn. Ol osy ótinishpen Úkimet basshysyna depýtattyq saýal joldaǵan edi. Onyń aıtýynsha, «Aýǵandyqtardyń», «Semeılikterdiń», «Chernobyldyqtardyń» «egde jastaǵylar» tobyna qosylýyna baılanysty olardyń medıtsınalyq kómekke muqtajdyǵy barǵan saıyn artyp keledi.
Depýtattyq saýalǵa jaýap bergen Úkimet basshysy Baqytjan Saǵyntaev Densaýlyq saqtaý mınıstrligi Almatydaǵy ǵımarattyń qurylysyna qarjy-ekonomıkalyq negizdemeni ázirlep, Qarjy mınıstrligine jobalaý-smetalyq qujattamany daıyndaýǵa qarajat bólý týraly bıýdjettik ótinim engizgenin habarlaıdy.
«Astana qalasyndaǵy qoldanystaǵy ǵımarat qanaǵattanarlyq jaǵdaıda. Onda 2009-2010 jyldary kúrdeli jóndeý júrgizilgen. Osyǵan baılanysty, Astana qalasynda jańa ǵımarat salǵan orynsyz dep sanaımyz. Bul rette, Almaty qalasynda Otan soǵysynyń múgedekterine arnalǵan klınıkalyq gospıtal ǵımaratyn salý jónindegi jobany iske asyrý sheńberinde gerıatrııalyq ortalyqty qurýdyń oryndylyǵy qaralatyn bolady», - deıdi Úkimet basshysy.
Baqytjan Saǵyntaev sonymen qatar, Qarýly Kúshter men quqyq qorǵaý organdarynyń qaıtys bolǵan qyzmetkerleriniń otbasy múshelerin Almaty jáne Astana qalalaryndaǵy Otan soǵysynyń múgedekterine arnalǵan gospıtaldarǵa bekitý máselesine jaýap berdi. Premer-Mınıstrdiń jaýabyna sáıkes, bul sanattaǵy adamdarǵa medıtsınalyq kómek tegin medıtsınalyq kómektiń kepildik berilgen kólemi sheńberinde zańnamada belgilengen tártippen respýblıkalyq jáne óńirlik deńgeılerde júzege asyrylady.
