Saǵyntaev: Árbir almatylyqtyń kásipker bolýǵa múmkindigi bar
ALMATY. QazAqparat- Almaty ákimi Baqytjan Saǵyntaev qala aktıviniń otyrysynda, kásipkerlikti qoldaýdyń naqtyly sharalaryn túsindirdi, dep habarlaıdy QazAqparat tilshisi.
Ákimniń aıtýynsha, eń aldymen, mádenıet, týrızm, kólik, logıstıka jáne ІT-ınnovatsııa salalarynda kásipkerlikti damytýǵa nazar aýdarylady.
«Otbasylyq bıznesti, sonyń ishinde kópbalaly otbasylardyń kásipkerlikpen aınalysýyna erekshe mán beriledi. Sondyqtan Almatyda «Baqytty otbasy» kópbalaly otbasylardy qoldaý ortalyǵynda áıelderdi kásipkerlikke úıretetin «Isker Ana» baǵdarlamasy qolǵa alyndy.
Múmkindigi shekteýli jandar úshin olardyń jumys oryndarynda tálimgerlik pen tájirıbe jınaqtaý ortalyǵyn ashý josparda. Bul ıgi bastama jyl sońyna deıin iske asady», - dedi Baqytjan Saǵyntaev.
Onyń aıtýynsha, kásipkerlikke jaǵdaı jasaý jáne ákimshilik kedergilerdi azaıtý maqsatynda Almatynyń alty aýdanynda «Qoldaý» kásipkerlik ortalyǵy qurylǵan. Munda barlyq memorgandardyń, damý ınstıtýttary men monopolısterdiń mamandary qyzmet kórsetetin bolady.
«Basty mindet – jergilikti kásipkerlerge qoldaý kórsetý.Memlekettik organdar ózderiniń qajettilikterine bizdiń kásipkerler shyǵaratyn ónimderdi alýlary tıis»,- dep atap ótti B. Saǵyntaev.
Aıta keterligi, Almatyda ShOB sýbektileriniń sany - 185 myń. Olar qalanyń JІÓ 40%-yn, salyqtyń 64%-yn qamtamasyz etedi, olar 600 myńnan astam jumys ornyn ashqan.
