Saǵyntaev «Altyn Orda» bazary jolynyń qurylysy týraly aıtty
ALMATY. QazAqparat - Almaty ákimi Baqytjan Saǵyntaev halyqqa esep berý kezdesýinde «Altyn Orda» bazary mańyndaǵy kólik jolaıryǵy týraly aıtty, dep habarlaıdy QazAqparat tilshisi.
Halyqqa esep berý kezdesýinde turǵyndar ákimnen qalanyń shyǵa berisindegi «Altyn Orda» bazarynda salynyp jatqan jol aıyryqtyń qurylysy qashan aıaqtalatynyn surady.
«Men oblysta turamyn, qalada jumys isteımin. Kúnine eki saǵat qalaǵa qaraı júrem, keri qaıtarda taǵy eki saǵatta qatynaımyn. Kúnine ómirimniń tórt saǵaty jol ústinde ótip jatyr. Ol jerde meniń densaýlyǵym da, júıkem de qalyp jatyr. Qarapaıym halyq kólik keptelisinen aryla almaıdy. Siz áleýmettik jelilerdi baqylap, osy problemalardy kórip otyratyn shyǵarsyz? Sondyqtan osy máseleni sheshýińizdi ótinemin. Biz budan sharshadyq», - dedi turǵyn.
Saǵyntaev bul jol aıyryq qurylysynyń tezirek bitýine nıetti ekenin jetkizdi.
«Altyn Orda» bazarynyń aınalma joly barlyǵymyzdy sharshatty. Qalaǵa kelgeli Altyn Ordanyń joly qashan sheshiledi degen máseleni estip kele jatyrmyn. Ókinishke qaraı, Altyn Orda bazary qalaǵa jatpaıdy. Ol Almaty oblysynyń jeri. Men de sol joldyń sheshilýin kútip júrmin. Onyń jumysy mınıstrliktiń quzyretinde. Mınıstrlik merdiger kompanııany tańdaǵan, aqshasy jetkilikti. Biraq merdigerdiń kúshi jetpeı me, basqasy ma, bergen aqshany ıgermeı áli kele jatyr. Ótkende Premer-mınıstr myrza kelgende osy máseleni taǵy kóterdik. Almatylyqtar úshin qalaǵa kirip-shyǵý qıynǵa soǵyp otyr. Eger bul jol bitse, bir máseleni sheshtik dep esepteımiz», - dedi Saǵyntaev.
Aıta keteıik, «Altyn orda» mańynda kólik jolaıryǵynyń qurylysy 2017 jyly bastalǵan bolatyn.
