Saǵyntaev Almatynyń ekonomıkalyq ahýalyn bıznes ókilderimen talqylady
ALMATY. QazAqparat – Almaty ákimi Baqytjan Saǵyntaev qaladaǵy ekonomıkalyq ahýaldy bıznes ókilderimen talqylady. Kezdesýde turaqtylyqty saqtaý jáne daǵdarysqa qarsy sharalar paketin ázirleý máseleleri pysyqtaldy, dep habarlaıdy QazAqparat tilshisi.
Qala ákimi kólik jáne logıstıka, bank sektory, saýda, ónerkásip jáne óndiristik kompanııa ókilderimen keńes ótkizdi. Kezdesý barysynda DDU pandemııa dep jarııalaǵan koronavırýs ınfektsııasynyń taralýyna jol bermeý sharalary talqylandy.
«Biz istiń naqtyly jaǵdaıyn anyqtaý jáne qala ekonomıkasynyń túrli sektorlarynda jaǵdaıdyń damý múmkindikterin boljaý úshin kezdesip otyrmyz», — dep atap ótti Almaty ákimi.
Kezdesýde saýda aınalymyn saqtaý, jumyspen qamtý, bıznes pen otandyq taýar óndirýshilerdi yntalandyrý jáne qoldaý kórsetý máseleleri de pysyqtaldy. Budan ózge, sýpermarketter men bazarlarda azyq-túlik baǵasyn baqylaýda ustaý mańyzdy ekeni aıtyldy.
