Saǵyntaev: Almatynyń densaýlyq saqtaý júıesin tsıfrlandyrý KVI-men kúresýge kómektesedi
ALMATY. QazAqparat- Baqytjan Saǵyntaev «Almaty» teleranasyndaǵy kezekti tikeleı efır barysynda qalanyń densaýlyq saqtaý júıesin tsıfrlandyrý jáne koronavırýs epıdemııasynyń taralýyn boldyrmaýǵa baǵyttalǵan jobalar týraly aıtty, dep habarlaıdy QazAqparat tilshisi.
«Densaýlyq saqtaý salasyn tsıfrlandyrý aıasynda búkil qala boıynsha alǵashqy medıtsınalyq-sanıtarlyq kómekke qadamdyq qoljetimdilikti anyqtaıtyn júıe quryldy. Júıe ýchaskelik dárigerler naýqastaryn aralaý kezinde óz patsıentterine jete almaıtyn aımaqtardy anyqtaýǵa múmkindik berdi. Osy aqparattyń negizinde salynatyn jańa emhanalar men aýrýhanalardyń medıtsınalyq qyzmetteriniń qadamdyq qashyqtyǵy eskerilip, jobalanady»,- deıdi ákim.
Onyń aıtýynsha, pandemııa kezinde jeke sektordyń qatysýymen qala koronavırýs epıdemııasynyń taralýyn boldyrmaýǵa baǵyttalǵan jańa jobalardy jedel júzege asyrdy. Mysaly, uıaly baılanys operatorlarynyń derekteri negizinde adamdar kóp jınalatyn oryndardyń saraptamasy jasaldy, aýrýhanalardyń 1S júıesine tikeleı ıntegratsııalanǵan dári-dármek qozǵalysynyń monıtorıng júıesi engizildi, medıtsınalyq qurylǵylardyń jumys mártebesin anyqtaıtyn joba júzege asty.
Sondaı-aq pandemııa kezinde Telemedıtsına ortalyǵy arqyly koronavırýs juqtyrǵan naýqastardy baqylaıtyn tolyqqandy júıe iske asty. Aldaǵy ýaqytta osy tájirıbeni sozylmaly aýrýlary bar qalalyqtardy qoldaý úshin paıdalaný josparlanýda.
