Saǵyntaev Almatydaǵy muz syrǵanaqtardyń daıyndalýyn tekserdi
ALMATY. QazAqparat – Búgin Almaty qalasynyń ákimi Baqytjan Saǵyntaev jumys saparymen qaladaǵy muz aıdyndarynyń daıyndyq barysyn tekserdi, dep habarlaıdy QazAqparat ákimdiktiń baspasóz qyzmetine silteme jasap.
Bıyl qysta qalada tórt tegin, ıaǵnı «áleýmettik» muz aıdyndary ashylady. Atap aıtqanda, 28 panfılovshylar saıabaǵynda, Tuńǵysh Prezıdent baǵynda, sondaı-aq Naýryzbaı men Túrksib aýdandarynda, «MART» oıyn-saýyq ortalyǵynda iske qosylady. Qala ákimi Baqytjan Saǵyntaev daıyndyq jumystarynyń barysyn tekserip, muzdyń sapasy men ilespe servıs ınfraqurylymyn durystaý jóninde birqatar eskertý jasady. «Muzdyń sapasyn retke keltirip, konkıdi jalǵa berý men tamaqtanatyn oryndardy durys jolǵa qoıyp, demalý oryndary men sanıtarlyq aımaqtardy oılastyrý kerek. Muz aıdyny kez-kelgen jastaǵy kelýshiler úshin qaýipsiz jáne yńǵaıly bolýy tıis», — dep merdiger kompanııa ókiline aıtqan qala ákimi B. Saǵyntaev, «áleýmettik» degenimizdiń sapasyzdyq emes ekenin tilge tıek etti. Muz aıdynynyń jalpy aýdany 12 myń sharshy metr. Aýa raıy jyly bolǵandyqtan muz qatpaıdy. Aıdyndar arnaıy júıemen salqyndatylady. 28 panfılovshylar saıabaǵy men Tuńǵysh Prezıdent baǵyndaǵy muz aıdyny muz alańdary túrinde jasalǵan. Sapar qorytyndysy boıynsha qala ákimi B. Saǵyntaev jetekshilik etetin qala ákiminiń orynbasarlaryna, aýdan ákimderi men tıisti basqarmalarǵa qalalyq muz aıdyndarynyń tehnıkalyq daıyndyq barysyn baqylaýdy kúsheıtýdi tapsyrdy.
