Saǵyntaev: Almatyda jyl ishinde jasyl jelekpen qamtamasyz etý bir adamǵa shaqqanda 1,6 esege ósti
ALMATY. QazAqparat - Baqytjan Saǵyntaev «Almatynyń 2021 jyly damýy: abattandyrý jáne kógaldandyrý jobalaryn» onlaın tanystyrylymy barysynda eń jasyl qala mártebesin qaıtarý úshin Almatyda qandaı sharalar qabyldanyp jatqanyn aıtty, dep habarlaıdy QazAqparat tilshisi.
Baqytjan Saǵyntaev atap ótkendeı, basty maqsat – qala ómiri úshin jaıly orta qurý, al damý josparlary «Almaty - 2050» strategııasynda anyqtalǵan. Birinshi jáne basty basymdyq - «Jasyl qala».
Júrgizilgen túgendeý kórsetkendeı, qalada 2,6 mln túp aǵash bar, biraq 23%-y eski. Jasyl jelekterdiń naqty qory nebári 1,9 myń aǵashty quraıdy. Qalamyzdyń damýy bastalǵan – Túrksib, Jetisý, Almaly jáne Bostandyq aýdandarynda eski aǵashtar jeterlik.
«Jasyl jelektermen qamtamasyz etý 1 adamǵa shaqqanda 7,7 m2 quraıdy, bir jyl buryn bul kórsetkish 4,6 m2 edi, al norma boıynsha 10 m2-den kem bolmaýy tıis. Bul baǵytta jumystar jalǵasýda», - dep atap ótti ákim.
Onyń aıtýynsha, ekologııa men kógaldandyrý – qala turǵyndary úshin eń sezimtal núkteler. Sondyqtan qala basshylyǵy men ekologııa jáne jasyl qor problemalaryna qatysy birqatar sharalardy qabyldady. Bizdiń maqsatymyz – qalaǵa jasyl jáne tanymal mártebesin qaıtarý.
2019 jyldyń qyrkúıeginde «Jasyl Almaty» baǵdarlamasy jarııalandy. Maqsat– qalanyń jasyl qoryn qalpyna keltirip, damytý.
2020 jyly jasyl jelekterdiń rekordtyq sany - 282 myń kóshet otyrǵyzyldy. Negizinen aǵash otyrǵyzý: Alataý aýdanynda - 187 myń, Túrksib aýdanynda - 46 myń jáne Medeý aýdanynda - 21 myń túp.
«Bıylǵy jyly 350 myń aǵash otyrǵyzý bastaldy. Kóktemde 50 myń aǵash otyrǵyzylady, negizgi otyrǵyzý kúzde bolady, óıtkeni bul eń qolaıly ýaqyt»,-dedi qala basshysy.
Almatyda jasyl jelekterdi sýǵarý úshin jańa skvajınalar salyndy, aryq jelisi túgendeldi.
«Qalada «Jasyl aýla» aktsııasy bastaldy. Ár turǵyn mamandardyń qadaǵalaýymen óz aýlasyna nemese jol boıyna aǵash otyrǵyza alady. Tek osy demalys kúnderi 600 aǵash otyrǵyzyldy. Biz belsendi qatysqany úshin almatylyqtarǵa rızamyz»,- dedi Baqytjan Saǵyntaev.
