Saǵyntaev Almatyda stýdenttik jataqhananyń qurylysyn toqtatty
ALMATY. QazAqparat- Almaty ákimi Baqytjan Saǵyntaev turǵyndardyń shaǵymynan keıin toǵyz qabatty jataqhananyń qurylysyn toqtatý týraly sheshim qabyldady, dep habarlaıdy QazAqparat tilshisi.
Áýezov aýdanyndaǵy «Altyn besik» yqshamaýdanynyń turǵyndary 17 aqpanda ótken Almaty qalasy ákiminiń eseptik kezdesýinde jataqhana salý josparyn qaıta qaraý týraly ótinish aıtyp, qurylys alańyna shaqyrǵan bolatyn.
«Atalǵan jerge baryp, Almaty tehnologııalyq ýnıversıtetiniń stýdentterine arnalǵan jataqhana ǵımaratyna jer telimin berý týraly qaýlynyń kúshin joıý týraly sheshim qabyldadym. Jýyrda stýdenttik úı úshin basqa qolaıly jer qarastyramyz», - dep jazdy Instagram-daǵy paraqshasynda B. Saǵyntaev.
Onyń aıtýynsha, endi bul jerge 120 oryndyq balabaqsha, sport jáne vorkaýt alańdary salynady.
«Ata-analar balalarǵa arnalǵan qosymsha oqytý men damytý ortalyqtaryn qurý qajettigin aıtty. Bul rette «Shyńǵa Órleý» áleýmettik klýbtarynyń tájirıbesi negizinde tegin úıirmeler men sport sektsııalaryn ashamyz», - dep atap ótti Almaty ákimi.
Áýezov aýdanyna jumys sapary barysynda qala ákimi yqshamaýdannyń qurylys salýǵa tyıym salynǵan aımaqtarda ornalasqan bos jerlerin de qarap shyqty. Munda jaıly jasyl qoǵamdyq oryndardy qurý josparlanyp otyr.
Eske salsaq, Nazarbaev dańǵylynda turatyn turǵyndardyń ótinishteri boıynsha B. Saǵyntaevtyń sheshimimen turǵyn úı kesheniniń qurylysy toqtatylǵan bolatyn.
