Saǵyntaev: Almatyda epıdemıologııalyq jaǵdaı kúrdeli, biraq baqylaýda

ALMATY. QazAqparat – Almatyda epıdemıologııalyq jaǵdaı kúrdeli, biraq baqylaýda. Bul týraly búgin Almaty qalasynyń ákimi Baqytjan Saǵyntaev QR Prezıdenti janyndaǵy Ortalyq kommýnıkatsııalar qyzmeti alańynda ótken onlaın brıfıng barysynda aıtty, dep habarlaıdy QazAqparat tilshisi.

Baqytjan Saǵyntaevtyń aıtýynsha, Memleket basshysynyń tapsyrmasyna oraı elimizde engizilgen eki aptalyq shekteýge baılanysty eki kúnnen beri jumys júrgizilip jatyr. Memlekettik komıssııanyń sheshimine sáıkes, birqatar kásiporyn jumysyn toqtatty.

«Onyń deni shaǵyn jáne orta bızneske baılanysty. Jalpy, 680 myńǵa jýyq jumys ornynyń qyzmeti toqtatyldy», - deıdi qala basshysy.

Sonymen qatar, ol qaladaǵy epıdemıologııalyq ahýalǵa toqtaldy.

«Epıdemıologııalyq jaǵdaıǵa keler bolsaq, jaǵdaı baqylaýda, biraq kúrdeli. Jalpy, óńirde 6 202 vırýs juqtyrý jaǵdaıy tirkelgen. Kúndelikti ósim 1,1%, onyń ishinde syrqattanǵandardyń negizgi bóligi jumysqa qabiletti turǵyndar (82%). Іndetten 2 485 adam jazylyp shyqsa, 26 adam kóz jumǵan. 6 shildede anyqtalǵan naýqastar sany – 113, reanımatsııada 64 naýqas jatyr. Aýrýdyń aýyrlyq dárejesine nazar salar bolsaq, jaǵdaıy asa aýyr naýqastar sany - 24, osyndaı naýqastar sany arta túsýde. 1 264 naýqastyń jaǵdaıy ortasha aýyr jáne 135 naýqastyń jaǵdaıy qanaǵattanarlyq deńgeıde», - dedi Baqytjan Saǵyntaev.