Saǵyntaev: Almatyda ekonomıkanyń jańa sektorlaryn damytýǵa basa kóńil bólinedi
Baqytjan Saǵyntaevtyń aıtýynsha, qala ekonomıkasynda ónerkásiptiń, qurylystyń, áleýmettik ekonomıka men jańa ındýstrııanyń úlesi mardymsyz.
Qala ekonomıkasynyń 33%-yn quraıtyn saýda eski kúıinde qalyp otyr. Al bul qalanyń jedel qarqynmen damýyna múmkindik bermeıdi.
«Sondyqtan biz qala ekonomıkasyn qurylymdyq reformalaýǵa bet aldyq. Jańa ekonomıka sektorlary basty nazarda. Saýda úlesin birtindep azaıtyp, joǵary biliktilikti qajet etetin óndiristik salalardyń damýyn kúsheıtý qajet, olar – kásibı jáne ǵylymı-tehnıkalyq qyzmetter, qarjy jáne saqtandyrý, aqparattyq-kommýnıkatsııalyq tehnologııalar, sondaı-aq kreatıvti ekonomıka salalary», - dedi Baqytjan Saǵyntaev.
Sonymen qatar, ol jańa Jibek jolynyń tranzıttik dálizindegi qolaıly geografııalyq jaǵdaıdy paıdalanyp, iri aımaqtyq kólik-logıstıkalyq hab retinde halyqaralyq jetkizý jáne taratý tizbekterine ený qajet ekenin tilge tıek etti.
Almaty Qazaqstandaǵy eń iri tutynýshy naryǵy jáne eldegi kóterme jáne bólshek saýdanyń eń kóp úlesin alatyndyqtan, logıstıkalyq áleýetti damytýǵa da basa nazar aýdarylady.
«Halyqaralyq áýejaıdy keńeıtýdiń qala úshin mańyzy zor. Jaqynda halyqaralyq áýejaıdyń jańa termınalynyń qurylysyn bastaý josparda. Termınaldy iske qosqan kezde jolaýshylar aǵynyn jylyna 6 mln adamǵa kóbeıtý kózdelgen, al ótkizý qabileti 2,5 esege artady»,-dedi qala basshysy.
