Saǵyntaev: «Almaty jastary» baǵdarlamasy keler jyly jalǵasady
ALMATY. QazAqparat - «Almaty jastary 3.0» jeńildetilgen nesıe berý baǵdarlamasy keler jyly da jalǵasady. Bul týraly qala ákimi Baqytjan Saǵyntaev «Almaty» telearnasynda tikeleı efırde aıtty, dep habarlaıdy QazAqparat tilshisi.
Qala ákiminiń aıtýynsha, 2021 jyldyń 10-31 naýryzy aralyǵynda «Almaty jastary 3.0» qalalyq baǵdarlamasy aıasynda ótinish men qujat qabyldandy, munda bastapqy jáne qaıtalama naryqta baspana alý úshin 5 paıyzdyq jeńildikpen nesıe beriledi.
Baǵdarlama aıasynda 1 000 jas otbasyny qamtý josparlanǵan, olardyń arasynda eń kóp suranysqa ıe mamandyqtar bar. Olar medıtsına qyzmetkerleri, muǵalimder, JOO-nyń jáne ǴZI-nyń oqytýshylary men ǵylymı qyzmetkerleri, mádenıet jáne sport salasynyń qyzmetkerleri, jýrnalıster, jazýshylar, halyqty áleýmettik qorǵaý salasynyń jáne quqyq qorǵaý organdarynyń qyzmetkerleri.
Buryn habarlanǵandaı, bıyl túsken 9 741 ótinishtiń 5 913-i oń sheshildi. 30 sáýirde iriktelgen alǵashqy 500 qatysýshyǵa ótinim saıtynda joldama berildi. Kelesi aptada, 7 kúnnen soń kelesi 500 joldama tapsyrylady. Azamattardyń jappaı shoǵyrlanýyn boldyrmaý maqsatynda joldama kezeń- kezeńmen beriledi.
«Baǵdarlama úlken suranysqa ıe. Sondyqtan ony júzege asyrý keler jyly da jalǵasady. Ótinimdi qabyldaýdyń bastalýy týraly aqparat baǵdarlamanyń saıtynda jáne BAQ-da jarııalanady»,- dedi Baqytjan Saǵyntaev.
